گوا۔ 05 مئی (اے پی پی) وزیرخارجہ بلاول بھٹو زرداری پارینے کہ پاکستان تین پہ تینی پت، بریبری، دودوربیدگی تنوع نا شرف و شنگھائی کمکار تنظیم نا اصل روح اٹ ساڑی اسیجائی شونداری نا دوئی کننگ نا اصول آتیا پکا یخین تخک و او اوفتیا پورو وڑاٹ عمل کننگ ءِ، اسیجائی شونداری کن علاقائی و اقتصادی رابطہ المی ءِ، پاکستان شنگھائی کمکار تنظیم ءِ اہم علاقائی پلیٹ فارم اس تکک، اسیجائی شونداری نا اصول علاقائی، اقتصادی رابطہ و کمکاری پاکستان نا وژن تون ہم گرنچ ءِ۔ وزیرخارجہ داخیال آتا درشانی ءِ جمعہ نادے آ بھارت نا شار گواٹی شنگھائی کمکار تنظیم (ایس سی او) نا وزراء خارجہ کونسل نا دیوان آن تران کرسا کرے۔ اوپارے کہ ایس سی او نا دیوان اٹی پاکستان نا نمائندگی کنکن شرفمندی نا ہیت اسے ، اسیجائی اقتصادی وژن ءِ مون آ دننگ کن اجتماعی رابطہ غاتیٹی زرکاری المی ءِ، سی پیک نیامی ایشیائی ریاست آتے راہداری واپار کن گچین ءُ موقع اس فراوان کیک۔ وزیرخارجہ پارے کہ ، پاکستان دہشت گردی نا چٹفنگ نا کوشست آتا بشخ مننگ کن سنبرینگوک ءِ، اوغانستان نا حالیت آک پوسکن آ چیلنج آتون اوار اوار وارخواہی ہم پیش کیرہ۔ بلاول بھٹو زرداری پاکستان نا داخواست ءِ دُوارہ پارے کہ جہانی برادری عبوری اوغان حکومت تون بامعنی گپ وتران کے تانکہ او واقعہ غاتے جوان وڑاٹ پہہ مننگ کیر۔ اوپارے کہ اوغانستان بھلا واکدار آتیکن گوازی نا پڑاس جوڑ مرسا کننگ ءِ ، نن اوغانستان نا بارواٹی مستین نا ردینک آتے دُوارہ بایدے کپن۔ جہانی برادری اوغان کمامدارآتیا سیاسی شمولیت نا جہانی وڑاٹ قبول مروک اصول آتے تینا کننگ و مسن تا تعلیم نا حق اتون اوار غٹ اوغان تا حق انا شرف ءِ کننگ آ زور شاغنگ ءِ برجاتخے، داڑتون اوار اوار جہانی برادری ہم اوغانستان، ڈیہہ و مچ آ دنیانا سلامتی کن انسداد دہشت گردی نا صلاحیت ءِ ودفنگ اٹ بایدے کمک کے۔ اوپارے کہ داہیت گڑتی اسے کہ جہانی برادری آن چپ اوغانستان اٹی دہشت گرد ٹولی اسہ ایلو تون کمک کننگ ءُ۔ پاکستان عبوری اوغان کمامدارآتیان خواست کیک کہ او دہشت گردی کن اوغان گل زمین ءِ کاریم اٹ اتنگ نا موکل تفننگ نا تینا قول ءِ برقرار تخر۔ اوجہانی برادری آن خواست کرینے کہ او دا سیکورٹی گڑتی تے مر کننگ کن کاریم کے تانکہ نئے بیرہ اوغانستان بلکن مچ آ ڈیہہ انا حقی لائخی تیان فائدہ ہرفنگ مرے۔ اسہ پرامن و سوگو ءُ اوغانستان اس نئے بیرہ علاقائی انضمام و اقتصادی کمکاری بلکن جہانی امن و سوگوی نا کلید ءِ، ننے یقین ءِ کہ ایس سی او اوغانستان رابطہ گروپ اوغانستان تون عملی کمکاری ءِ مربوط کننگ اٹ کڑد ادا کننگ کیک۔
