بنجائی حکومت تعلیم ءِ محروم تپہ غاتا درگہ اسکان سرکننگ کن کوشست کننگ ءِ، تعلیمی بشخ اٹی ٹیکنالوجی و پوسکن آ   ڈٹ آتا درستی راستی

اسلام آباد۔ 05 مئی (اے پی پی) بنجائی حکومت راج انا غٹ تپہ خاص وڑاٹ محروم تپہ غاتیان تعلق تخوک آ چناتے تعلیم نا گچین وارخواہی فراوان کننگ و دا آسراتی ءِ اوفتا درگہ اسکان سرکننگ کن تینا اولیکو سال اٹی تعلیمی بشخ اٹی ٹیکنالوجی و جدت نا حامل ڈٹ درستی راستی کرفنگ کن اہم گام گیج کرینے۔ وزیراعظم شہباز شریف مشکل زرگزرانی حالیت آتیٹی تعلیمی خڑچ اٹی ودکی نا رداٹ دا سال انا بناٹی اِرا پوسکن آ ڈٹ ’’اسکولز آن وِیلز‘‘ و ’’پاکستان ٹیلی اسکول ایپ‘‘ نا قیادت ءِ کرے۔ اوفروری ٹی اولیکو ریسہ ٹی 8 بس آتیا تالان موبائل اسکول نا ڈٹ انا بناءِ کرے ہرا اسلام آباد و کیبی علاقہ غاتا چناتے پرائمری کہول انا تعلیم فراوان کننگ ءِ۔ دارالحکومت نا چندی ہند آتیا سلوک دا بس آک کمپیوٹر، ڈیسک، وائٹ بورڈ و ایل سی ڈی تیان شپ ءُ ہرا استاد و طالب علم آتے مشغول کننگ و ہیل کننگ نا چاگڑد اس فراوان کیرہ۔ وزیراعظم بنائی دود اٹی چناتے قوم انا آخبت نا جوڑ کروک گوندسا داہیت انا درشانی ءِ کرے کہ حکومت ورناچین ءِ زیات آن زیات تعلیمی آسراتی فراوان کننگ کن پدریسہ کوشست کرسا کیک۔ حکومت نا کنڈآن موبائل اسکول آتا ڈٹ خاص وڑاٹ  خلقی علاقہ غاتیٹی خواندگی نا کچ ءِ ودفنگ کن سخت و پدریسہ کوشست آتا بشخ اسے۔ بروک آ ریسہ ٹی بس آتا کچ ءِ ودفنگ و دا ڈٹ ءِآزاد کشمیر تون اوار ملک انا ایلو بشخ آتسکان ودفنگ نا ڈٹ ءِ۔ دا ڈٹ آن گوجالنگوک آ و محروم کمیونٹی تا چناتے خوانوک و پین تعلیم و تکنیکی مہارت دوئی کننگ نا قابل جوڑ کننگ اٹ کمک رسینگک۔ یونیسیف نا رداٹ پاکستان اٹ 5 آن 16 سال انا وئی انا کم و ود 22.8 ملین چنااسکول آ ہِنپننگ ءُ ہرا دا وئی نا ٹولی نا کل آبادی نا 44 درسد ءُ و انفارمیشن ٹیکنالوجی نا پوسکن آمہارت آتا کمک اٹ اوفتسکان تعلیم ءِ رسینگ نا قابل کننگ نا سخت گرج ءِ۔ وزیراعظم شہباز شریف چناتے اُراتسکان تعلیم سرکننگ کن مارچ اٹی بنجائی وزارت تعلیم نا کنڈآن تیار کروک پاکستان ٹیلی اسکول ایپ نا بناءِ کرے و دانا است  بڈ بھرم دوئی مس۔ بیرہ اسہ ہفتہ ٹی ایپلی کیشن ءِ 10,000وار ڈاؤن لوڈ کننگا، 5500 ءِ درج کننگا و 310 شار تیٹی 17000 ویڈیوتے ہُننگا۔ دا ڈٹ آتا مسخت جماعت اول آن دُوانزدہ اسکان نا طالب علم آتے آن لائن تعلیم فراوان کننگ ءِ۔ چناتے تعلیم تننگ نا اسہ پین گام اس ہرفسا حکومت 30جون اسکان اسلام آباد دارالحکومت نا علاقہ ٹی اسکول آن پیشن 70،000چناتے اسکول آتیا اتنگ کن کاریم کننگ ءِ۔ یات سلے کہ شہباز شریف بطور وزیراعلیٰ پنجاب تینا دور اٹی بڑزکو تعلیم دوئی کروک آ طالب علم آتے  ٹی لیپ ٹاپ بشخنگ نا اسکیم ءِ سرسہبی اتون عملی دروشم اس تس و اسہ وار ولدا وزیراعظم تعلیمی ادارہ غاتیٹی نمان سرسہبی دوئی کروک آ طالب علم آتیٹی 100،000لیپ ٹاپ بشخنگ نا ڈٹ اس جوڑ کرینے انتئے کہ او دا ہیت آ پکا یخین تخک کہ ورناتے انفارمیشن ٹیکنالوجی نا پوسکن آ مہارت آتیان شپ کننگ ہیل کننگ و اختراعی عمل نا کسر ءِ۔ تدوک آ سال باسنی ٹی پاکستان اٹی موسمیاتی بدلی تا سوب آن بروک آ بھلا نوکاپ بھسکاری کریسس و نوکاپ آن زہمی علاقہ غاتیٹی 33 ملین بندغ زہمی مسوسر ۔ نوکاپ بلوچستان اٹی اسکول آتون اوار اہم انفراسٹرکچر ءِ بھس کرے و اسکول آتے دُوارہ  ملنگ نا دمدستی گرج ءِ مون آ تخسا وزیراعظم راہشونی فراوان کرے و جنوری ٹی بلوچستان نا علاقہ صحبت پور اٹی اسہ اسمارٹ اسکول اسے نا بنا ءِ کرے۔ اِرا تُو انا ریکارڈ مد اٹی جوڑ کرو ک آ دا اسکول پوسکن آ آئی ٹی آسراتی تیان شپ ءِ۔ اوہندا علاقہ ٹی نوکاپ آن زہمی گورنمنٹ بوائز سیکنڈری اسکول کلی جیاخان نا پوسکن آ ماڑی نا ہم دُوارہ بناءِ کرے۔ بنجائی حکومت نا دا اہم گام گیج آتیان خاص وڑاٹ راج انا نزور تپہ اسکان تعلیم ناآسان  و گچین رسینگ ءِ پک کننگ انگ ءِ۔