پاکستان و جاپان نا نیام اٹ گچین دوستانہ تعلقداری ہر گدرینگوک آ دے اتون سوگو مننگ ءِ، بنجائی وزیر خزانہ و محصولات اسحاق ڈار

اسلام آباد۔ 04 مئی (اے پی پی) بنجائی وزیر خزانہ ومحصولات سینیٹر محمد اسحاق ڈار پارینے کہ جاپان پاکستان نا بھلا شونداری شریدار آتیان اسٹ ءِ ، ہڑتوم آملک آتا نیام اٹ گچین دوستانہ تعلقداری  ءِ ہرا ہر گدرینگوک آ دے اتون سوگو مننگ ءِ۔ داخیال آتا درشانی ءِ او جاپان نا سفیر مٹسوہیر وواڈاتون گپ وتران کرسا کرے ہرا پنچ شنبے نادے آ داڑے فنانس ڈویژن اٹی اوڑتون اوڑدہی کرے۔ وائس چیئرمین ٹویوٹا کمپنی، وزیراعظم نا خصوصی کمکار، فنانس طارق باجوہ، سیکرٹری خزانہ و سینئر آفیسر آک دیوان اٹی ساڑی ئسر۔ وزیرخزانہ اسحاق ڈار سفیر ءِ ساڑی حکومت نا زرگزرانی چیلنج و اولیت آتیان معلومدار کرے۔ اوسفیر ءِ زرگزران ءِ شونداری و سوگوی نا کنڈا دننگ کن حکومت نا کنڈآن نافذ کروک آ زرگزرانی پالیسی و اصلاحات آتا بارواٹ پارے۔ وزیرخزانہ پاکستان و جاپان نا نیا م اٹ خوشگوار تعلقداری آ ہم تینا خیال آتا درشانی ءِ کرے و پاکستان اٹ جاپان نا زرکاری نا ستا ءِ کرے۔ اوپارے کہ ہڑتوم آ ملک آتا نیام اٹ گچین دوستانہ تعلقداری ءِ ہر ا ہر گدرینگوک آ دے اتون سوگو مننگ ءِ۔ اوپارے کہ جاپان پاکستان نا بھلا شونداری شریدار آتیان اسٹ ءِ و او دا ہیت آ پکا یخین تخک کہ ہڑتوم آ ملک آتا تین پہ تینی فائدہ کن چندی بشخ آتیٹی کمکاری  پین سوگو مریک۔ وزیرخزانہ پاکستان اٹی زرکاری نا ممکنہ وارخواہی تے پین مون آ تخا و پاکستان اٹ جاپانی کمپنی تا زرکاری نا ڈٹ آتا ستا  ءِ کرے۔ جاپان نا سفیر مسٹرواڈا مٹسوہیرو حکومت نا کنڈآن عملی پالیسی و گام گیج آتا ستا  ءِ کرے و پارے کہ جاپان پاکستان تون تینا ہڑتوم آ کنڈآتا تعلقداری تے بھاز اہمیت ایتک۔ اوساڑی حکومت نا زرگزرانی پالیسی تیا پت انا درشانی ءِ کرسا باوری کرفے کہ بروک آ دے تیٹی ہڑتوم آ ملک آتا نیام اٹ کاروباری،زرکاری و اقتصادی رابطہ پین سوگو مریک۔ وزیرخزانہ سفیر نا منت واری ءِ ہرفے و ہڑتو م آ ملک آتا نیام اٹ واپار، زرکاری واقتصادی تعلقداری تے گچین کننگ اٹ  پورو کمکاری نا باوری کرفے۔