اسلام آباد۔ 04 مئی (اے پی پی) بنجائی وزیر واپار سید نوید قمر تون سعودی عرب کن پندار سفیر احمد فاروق پنچ شنبے نادے آ داڑے اوڑدہی کرے۔ اوڑدہی ٹی ہڑتوم آ ملک آتا نیام اٹ واپاری تعلقداری تے ودفنگ نا امور آ گپ وتران کننگا۔ داوخت آ بنجائی وزیر سعودی عرب ءِ پاکستانی برآمد آتے ودفنگ کن کشت وکشار و ٹیکنالوجی نا بشخ اٹی جارحانہ مارکیٹنگ نا گرج آ زور شاغا۔ اوپارے کہ پاکستان اٹی سعودی عرب ءِ زرعی مصنوعات و ٹیکنالوجی برآمد کننگ نا بے پناہ لائخی ءِ و ہڑتوم آ ملک آتے کمکاری نا پوسکن آ بشخ آتا پیدواری کن اواری اٹ کاریم کننگ نا گرج ءِ۔ سید نوید قمر پندار سفیر ءِ دا چرجوئی ٹی تینا پورو کمکاری نا باوری کرفے۔ داوخت آپندار سفیر احمد فاروق واپاری تعلقداری تے گچین کننگ کن سید نوید قمر نا کوشست آتا ستاءِ کرےو زرکاری نا پین وارخواہی پٹنگ کن وزارت واپار تون اواری اٹ کاریم کننگ نا است خواہی نا درشانی ءِ کرے۔ اوڑدہی ٹی ہڑتوم آ فریق آک واپار و زرکاری نا بشخ اٹی پاکستان و سعودی عرب نا نیام اٹ ہڑتوم آ کنڈآتا تعلقداری تے سوگو کننگ نا عزم انا درشانی ءِ کریر۔
