اسلام آباد۔ 04 مئی (اے پی پی) بنجائی وزیر حوالکاری و شینکاری مریم اورنگزیب پی ٹی آئی چیئرمین عمران خان ءِ چیلنج کرینے کہ او دے عدالت آ ہِننگ آن ہراسٹ آن خطرہ ارے شاہدی ایتے ورنہ تینا باہ ءِ بند کے۔ پنچ شنبے نادے آ تینا بیان اٹی بنجائی وزیر حوالکاری پارے کہ فارن ایجنٹ بہروپیہ ءِ ہراحالیت آتا رداٹ سکرپٹ و حلیہ جوڑ کیک، دزگیری نا خلیس آن او چارپائی نا کیرغ و ضمانت خارج مننگ نا خلیس آن وہیل چیئر آ راگ کیک۔ اوپارے کہ فارن ایجنٹ نا نت تیا زور اف، اونا دماغ آ سازشی زور ءِ۔ مریم اورنگزیب پارے کہ وہیل چیئر آ تولسا دوبہ خلنگ نا جاگہ غا او عدالت آہنسا شاہدی پیش کے کہ اونا جون ءِ دیردیر آن خطرہ ءِ۔ اوپارے کہ عمران خان ءِ خطرہ داسہ بیرہ فارن فنڈنگ، توشہ خانہ، ٹیریان کیس آن ء ہنداسوب آن گولی، پلستر، ڈبہ، وہیل چیئر و الیکشن نا بہانہ کننگ ءِ۔ اوپارے کہ عمران خان ءِ ہراتم کہ عدالت بٹنگک تو او گولی، پلستر، معذوری، بالٹی ڈبہ نا بہانہ ءِ کیک و داسہ وہیل چیئر نا راگ ءِ کننگ ءِ۔ اوپارے کہ عمران خان مہالو تینا حکومت ءِ اینک کننگ نا ملبہ ءِ امریکہ غا شاغا، سائفر نا ڈرٹی گوازی ءِ کرے، ولدا امریکہ غان معافی خواہسا جنرل باجوہ، ولدا آصف علی زرداری و ولدا محسن نقوی آ ملبہ ءِ شاغا۔ اوپارے کہ عمران خان چار سال انا بے سہبی و اسمبلی تے پرغنگ نا ملبہ ءِ جنرل باجوہ غا شاغا، شہید، ادارہ و اوفتا سرکڑدہ غاتا برخلاف اندرون و بیرون ملک غلیظ مہم اس چلیفوک آ ولدا دوبہ خلنگ ءِ۔ اوپارے کہ عمران خان قوم ءِ اُراتیان کشنگ آن مست تینٹ تو اُراغان پیش تمے۔
