اسلام آباد۔ 03 مئی (اے پی پی ) بنجائی وزیر حوالکاری و شینکاری مریم اورنگزیب پارینے کہ پاکستان ناآئین آزادی صحافت و شاری تا سہی معلومداری اسکان رسینگ نا حق انا ضامن ءِ ، بدبختی اٹ پاکستان اٹی 2018 آن 2022 اسکان صحافت اسہ سخت ءُ دور اسے آن گدرینگا، پی ٹی آئی نا چار سال انا دور اٹی داوڑ پراسرار سنسر شپ اس برجائسک ہرا صحافی تے خوفزدہ کرے، ہمووخت انا وزیراعظم ءِ جہانی ادارہ ’’پریس فریڈم پریڈیٹر ‘‘ نا شرمناک خطاب تس، عمران خان نئے بیرہ صحافی تا توار ءِ بند کرے بلکن اوفتا قلم تے پرغا ، اوفتے برمتہ کرے، سم اٹ خلک۔ چارشنبے نادے آ آزادی صحافت نا جہانی دے انا وخت آ تینا بیان اٹی بنجائی وزیر حوالکاری و شینکاری پارے کہ اینو پاکستان تون اوار مچ آ دنیاٹی آجوئی صحافت نا جہانی دے ءِ اڈتننگ انگ ءِ۔ وزیراعظم پاکستان شہباز شریف نا کماشی ٹی سیوتی حکومت پریس نا آزادی آ پورو یخین تخک۔ پاکستان نا آئین آزادی صحافت و شاری تا سہی معلومداری اسکان رسینگ نا حق انا ضمانت ایتک۔ بنجائی وزیر حوالکاری آزادی صحافت نا جہانی دے انا وخت آ ہموصحافی تے خراج عقیدت پیش کرے ہرافک سچ انا پٹنگ اٹ تینا جون آن دوتے سلار۔ اوپارے کہ بدبختی اٹ پاکستان اٹی 2018 ء آن 2022ء اسکان صحافت اسہ سخت ءُ دور اسے آن گدرینگا، اوپارے کہ 2017 ء ٹی ورلڈ پریس فریڈم انڈیکس اٹی پاکستان 139 می نمبرآ ئسک، پی ٹی آئی نا میڈیا دشمن پالیسی تا سوب آن پاکستان نا درجہ بندی ٹی 12 پوائنٹ آتا پین کمتی مس۔ ہمو وخت آ وزارت عظمیٰ نا کرسی آ تولوک بندغ ءِ پریس فریڈم پریڈیٹر نا شرمناک خطاب ءِ تننگا، عمران خان تینا چار سالہ دور اٹی نئے بیرہ صحافی تا توار ءِ بند کرے بلکن اوفتا قلم ءِ پرغا، اوفتے برمتہ کرے، صحافی تا پڈاٹی سم خلک، پی ٹی آئی نا چارسالہ دور صحافی تیکن خطرناک ءُ دور اس ئسک۔اوپارے کہ صحافی راج ءِ واکدار کیک، کہاوت ءِ کہ معلومداری ٹی طاقت ءِ و صحافی نمے ہمو طاقت ءِ ایتک۔ حکومت صحافی تا رکھ اکن عملی گام گیج کرسا کیک۔
