اسلام آباد۔ 03 مئی (اے پی پی) اسپیکر قومی اسمبلی راجہ پرویز اشرف مسکوہی چیف جسٹس ثاقب نثار نا مار نجم ثاقب نا آڈیو لیک نا جاست وپاست کن خصوصی کمیٹی اس جوڑ کرے۔ قومی اسمبلی سیکرٹریٹ آن جاری نوٹیفکیشن نا رداٹ محمد اسلم بھوتانی کمیٹی نا چیئرمین پن کننگانے وخت اس کہ ایلو باسک آتیٹی شاہدہ اختر علی ، محمد ابوبکر، چوہدری محمد برجیس طاہر، شیخ روحیل اصغر، سید حسین طارق، ناز بلوچ، خالد حسین مگسی، وجیہہ قمر و ڈاکٹر محمد افضل خان ڈھانڈلہ ئسک اوار ءُ۔ کمیٹی تینا جاست وپاست و انکوائری نا چرجوئی ٹی جاست وپاستی ادارہ غاتا کمک ءِ ہلنگ کیک ۔ کمیٹی جوان جاست وپاست کرسا رپورٹ قومی اسمبلی ٹی پیش کیک۔ یات سلے کہ مسکوہی چیف جسٹس ثاقب نثار نا مار نجم ثاقب نا مبینہ آڈیو مون آ بسوسس ہراٹی او پی ٹی آئی نا گچین کاری ٹکٹ ترفنگ نا بدلہ اسہ کروڑ 20 لکھ نا خواست کننگ اٹی ءِ۔
