اسلام آباد ۔ 03 مئی (اے پی پی) آذربائیجان نا بانی قومی راہشون و ایماندار صدر حیدر علیوف نا 100 می سال دے انا وخت آ بنجائی دارالحکومت اسلام آباد اٹی دود اس اڈ ہلک ہرانا بست وبند ءِ آذربائیجان نا سفارت خانہ کریسس۔ دود اٹی بنجائی وزیر سیفران و مذہبی امور سینیٹر محمد طلحہ محمود ، سفارت کار، سول سوسائٹی نا نمائندہ شخصیت و صحافیک بشخ ہلکر۔ داوخت آ پاکستان اٹی آذربائیجان نا سفیر خضر فرہادوف تران کرسا پارے کہ پاکستان و آذربائیجان نا نیام اٹ گچین و دوستانہ تعلقداری ءِ، دا تعلقداری ننا متکن آتاریخی روایت آتیا تالان ءِ، پڑوآجوئی آن پد پاکستان آذربائیجان ءِ امنا کروک آ اولین ملک آتیٹی اول سرئسک۔ اوپارے کہ حیدرعلیوف آذربائیجان و پاکستان نا تعلقداری تا معمار ءِ و او پاکستان ءِ بھاز اہمیت تسکہ۔ حیدر علیوف تینا دور ءِ اقتدار اٹی 9 آن 11 اپریل 1996 آ پاکستان نا سرکاری دورہ ءِ کرے، دادورہ ٹی پاکستان و آذربائیجان نا نیام اٹ چندی معاہدہ غاتیا دستخط مس ، حیدر علیوف نا دورہ ہڑتوم آ ملک آتا نیام اٹ تعلقداری تا شونداری ٹی اہم ءُ کڑد اس ادا کرے۔ آذربائیجان نا سفیر پارے کہ پاکستان و آذربائیجان نا ایلم ملک آتا نیام اٹ غٹ بشخ آتیٹی بڑزکو کہول آ تعلقداری ءِ۔ اوآذربائیجان نا قومی راہشون نا 100 می سال دے اٹی شریک بندغ آتا منت واری ءِ ہرفسا پارے کہ آذربائیجان 2023 آ حیدر علیوف نا سال گوندانے، دااہم موقع ءِ آذربائیجان و پیشن نا ملک بھاز شان اٹ اڈتننگ انگ ءِ۔ آذربائیجان نا سفیر خضر فرہادوف پارے کہ ہر قوم اٹی باصلاحیت شخصیت مریک ہرا قومی آجوئی و آجوئی نا تاریخ اٹ نجات دہندہ نا کڑد ادا کیک، حیدر علیوف نا شمار ہم ہنداوڑنا بندغ آتیٹی مریک۔
