اسلام آباد۔ 02 مئی (اے پی پی) چیئرمین سینیٹ محمد صادق سنجرانی پارینے کہ پاکستان و ایران ڈیہہ نا شونداری، امن و شونہالی نا تغ ءِ پورو کننگ کن کوشست کننگ ءُ، ہڑتوم آ ملک آتا نیام اٹ جہانی کہول آ کمکاری سفت نا قابل ءِ۔ داخیال آتا درشانی ءِ او پاکستان اٹ ایران نا سفیر سید محمد علی حسینی تون گپ وتران کرسا کرے ہراسے شنبے نادے آ داڑے اوڑتون سپاروکی اوڑدہی کرے۔ اوڑدہی ٹی ہڑتوم آکنڈآتا تعلقداری و تین پہ تینی است خواہی نا امور آ گپ وتران کننگا۔ اوڑدہی ٹی چیئرمین سینیٹ محمد صادق سنجرانی پارے کہ پاکستان و ایران ڈیہہ نا شونداری، امن و شونہالی نا تغ ءِ پورو کننگ کن کوشست کننگ ءُ، ڈیہہ نا شونداری ننا اسیجائی ویژن ءِ۔ ہڑتوم آ ملک آتا مذہبی ، دودوربیدگی و راجی مماثلت ہڑتوم آ کنڈآتا کمکاری ءِ مون آ سدننگ کن سوگو بنداو فراوان کیک۔ پاکستان و ایران نا نیام اٹ پارلیمانی رابطہ، واپاری کمکاری و ہڑتوم آ کنڈآتا اقتصادی تعلقداری ٹی پین سوگوی المی ءِ۔ اوپارے کہ السی رابطہ غاتا مون آ دننگ کن پارلیمانی سفارتکاری آن پبی فائدہ ہرفوئی مریک۔ ہڑتوم آ ملک آتا نیام اٹ جہانی کہول آ کمکاری سفت نا قابل ءِ۔ پاکستان ایران تون تینا تاریخی تعلقداری تے بھاز اہمیت ایتک۔ ننا است خواہی ءِ کہ دا تعلقداری تے سیاسی، راجی و اقتصادی کہول آ پین سوگو کننگے۔ ایران نا زرکار و پوریاگرآتیکن پاکستان اٹ واپار و زرکاری نا وارخواہی ساڑی ءِ۔ پاکستان و ایران مدام اسہ ایلو تون جہانی فورم تیا کمک کرینو ہرا ستاکڑزک۔ ہڑتوم آ ملک آتا نیام اٹ واپار نا مون آ دننگ کن بلوچستان نا سیمی علاقہ غاتیٹی پین واپاری کسر ملنگ و سیمی منڈی جوڑ کننگ نا گرج ءِ۔ داوخت آ ایرانی سفیر سید محمد علی حسینی پارے کہ ہڑتوم آ ملک آتا نیام اٹ ہڑتو م آ کنڈآتا کمکاری ءِ پین سوگو کننگ نا گرج ءِ۔ چیئرمین سینیٹ ایرانی سفیر نا پاک۔ایران تعلقداری تے پین سوگو کننگ نا چرجوئی ٹی کوشست آتا ستاءِ کرے۔ اوڑدہی ٹی چیئرمین سینیٹ ایران نا مجلس شوریٰ نا اسپیکر کن ہم نیک است خواہی نا درشانی ءِ کرے۔
