اسلام آباد۔ 02 مئی (اے پی پی) اسپیکر قومی اسمبلی راجہ پرویز اشرف سے شنبے نادے آ پارلیمنٹ ہاؤس اٹی ہنگری نااسلامی تعمیراتی میرات نا عکسی نمائش نا بنا ءِ کرے۔ دا نمائش اسلامی جمہوریہ پاکستان نا 1973 نا آئین نا گولڈن جوبلی نا رداٹ اڈتننگ انگ ءِ۔ نمائش قومی اسمبلی سیکرٹریٹ و پاکستان اٹی جوڑ ہنگری ناسفارت خانہ نا کمک اٹ اڈتننگ انگ ءِ۔ نمائش اٹی پارلیمنٹ نا باسک، سفارتکار، سول سوسائٹی، میڈیا نا نمائندہ و بڑزکو سرکاری کمامدارآک بشخ ہلکر۔ نمائش اٹی ہنگری نا شاندار اسلامی تعمیراتی میرات و اسلامی تہذیب آن اونا تعلق ءِ عکسی فن پارہ غاتا کمک اٹ تالان کننگانے۔ اسپیکر قومی اسمبلی ہنگری نا سفارت خانہ نا کنڈآن عکسی نمائش نا اڈتننگ آ منت واری ءِہرفے و پارے کہ ہنگری نااسلامی تعمیراتی میرات ءِ زیبائی اٹ تالان کننگانے۔ اوپارے کہ دودوربیدگی کہول آ ہن و بر تا مون آ دننگ آن ہڑتوم آ ملک آتیٹی ہم گرنچی ءِ مون آ دننگ دوئی مریک۔ ہنگری نا سفارت خانہ نا کنڈآن اسلامی تعمیراتی میرات آ عکسی نمائش نا اڈتننگ سفت نا قابل ءِ۔ ہنگری نا سفیر اسپیکر قومی اسمبلی ءِ اسلامی جمہوریہ پاکستان نا 1973 نا آئین نا گولڈن جوبلی آ مبارکبادی تس۔ اوپارے کہ دودوربیدگی و پارلیمانی کہول آ ڈل آتا ہن وبرآن ہڑتوم آ کنڈآتا تعلقداری ءِ پین ودفنگ دوئی مریک۔
