اسلام آباد۔ 02 مئی (اے پی پی) وزیر مذہبی امور سینیٹر محمدطلحہ محمود تون سے شنبے نادے آ وزارت مذہبی امور اٹی فلسطینی قومی اسمبلی نا باسک مامون اسعد تمیمی اوڑدہی کرے۔ داوخت آ گپ وتران کرسا اوپارے کہ ریاستی و السی کہول آ فلسطینی الس نااخلاقی و سفارتی مخ تفی ءِ برجاتخنہ۔ فلسطین نا ویل آ پاکستانی ریاست نا موقف بدل مفروک و دوٹوک ءِ۔ اوپارے کہ روچہ مبارک اٹی مسجد اقصیٰ ناتقدس نا لتاڑ و کودک نمازی تیا بیدادی نا مہذب دنیاٹی درور ملپک۔ اقوام عالم فلسطینی الس آ برجاظلم انا برخلاف توار بڑزکے۔ اوپارے کہ او لبنان اٹی ساڑی فلسطینی کیمپ انا دورہ ءِ کرینے۔ تینا اسلامی ایڑھ ایلم تتون یکجہتی کن فلسطین آ ہِننگ خوائسکہ ولے اسرائیلی بارڈرآ توننگا۔ پاکستان اٹ فلسطینی ایلم تتون یکجہتی ناہرپروگرام اٹی خاص شریک مریوہ۔ روچہ نا تُو اٹی اسرائیلی فورس آتا کنڈآن مسجد اقصیٰ ناتقدس نا لتاڑ نمازی تیا بیدادی نا واقعہ غاتیا گپ وتران کننگا۔ فلسطینی پارلیمنٹ نا باسک پارے کہ فلسطینی لمہ ایڑھ کمک کن امت مسلمہ نا کنڈآ ہُننگ ءُ۔ پاکستان نا سوب آن فلسطین نا ویل مچ آ دنیا ٹی تالان ءِ۔ سفارتی و اخلاقی مخ تفی آ پاکستانی الس و حکومت نا منت وار اُن۔
