قومی شونداری نا عظیم جہد اٹی ننا جواں ہمت خواری کش آتا کڑد بھاز اہمیت تخک، چیئرمین سینیٹ و ڈپٹی چیئرمین سینیٹ

اسلام آباد۔ 01 مئی (اے پی پی) چیئرمین سینیٹ محمد صادق سنجرانی و ڈپٹی چیئرمین سینیٹ مرزا محمد آفریدی خواری کش آتا جہانی دے انا وخت آ تینا کلہو اٹی پارینو کہ قومی شونداری نا عظیم جہد اٹی ننا جواں ہمت خواری کش آتا کڑد بھاز اہمیت تخک۔ پاکستان ہمو غٹ روشنا اصول آتیا عمل کننگ ءِ ہرافتے ٹی مزور آتا حق انا فراوانی و رکھ ریاست نا آئین فراوان کیک۔ اوفک پاریر کہ پاکستان تون اوار مچ آ دنیا ٹی یکم مئی  خواری کش آتا حق انا رکھ انا علامت نا وڑاٹ اڈتننگک و پاکستان اٹی ہم خواری کش آتا حق انا فراوانی ءِ پک کننگک۔ چیئرمین سینیٹ پارے کہ کسبکار و غیر کسب کار مزور آتا کم آن کم معاوضہ ٹی ودکی کرسا خواری کش آتا ویل آتے پین کم کننگ مریک۔ حکومت وطن عزیز نا شونداری و شونہالی کن نئے بیرہ اندرون ملک کاریم کروک آ خواری کش بلکن پردیسی تا ویل آتا ایسری و آسودہی کن چندی گام گیج آتے کننگ ءِ۔ چیئرمین سینیٹ پارے کہ یکم مئی مزور آتون یکجہتی نا دے  ءِ۔ دادے ننے ہمو وارخواہی تے امناکننگ و خراج تحسین پیش کننگ نا اسہ موقع اس فراوان کیک ہراخواری کش آک تینا تینا مکل آتا شونداری ، شونہالی و راجی آسراتی کن کرینو۔