حکومت خواری کش آتا حق انا رکن اکن سنبرینگوک  ءِ، اعظم نذیر تارڑ

اسلام آباد۔ 01 مئی (اے پی پی) بنجائی وزیر کانود اعظم نذیر تارڑ پارینے کہ ساڑی حکومت خواری کش آتا حق انا رکھ اکن سنبرینگوک ءِ ، مزور آتا جہانی دے نئے بیرہ خواری کش آتا تقدس و وقار نا نشانی ءِ بلکن دا مزور آتا اہمیت نا اعتراف ہم ارے انتئے کہ مزور آک زرگزرانی شونداری ٹی مرکزی حیثیت اس تخرہ۔ دوشنبے نادے آ یوم مئی آ تینا کلہو اٹی بنجائی وزیر پارے کہ مزور آک مچ آ قوم انا جوڑ کروک آک ءُ، ہنداسوب آن اینو قوم مزور آتے خراج تحسین پیش کیک و ملک انا شونداری ٹی اوفتا کڑد و کمکاری نا ستاءِ کیک۔ اوپارے کہ اسلام راجی انصاف ، بریبری و انسانی حق انا شرف نا اصول آتیا ہم زور شاغانے۔ اللہ تعالیٰ و خاتم النبیین نبی اکرم صلی اللہ علیہ و آلہ وسلم ننے مزور آتا کانودی و بنداوی انسانی حق انا اہمیت ءِ بھاز اہمیت تننگ نا پرمان کرینے۔ اوپارے کہ اسلام مزور آتا خید انا بارِنگ آن مست اوفتا مزوری ءِ تننگ نا پرمان ایتک۔