وزیراعلیٰ شہباز شریف نا کاریم کننگ نا غیر معمولی وڑو رفتار نا مثل ہر جاگہ غا تننگک، مریم اورنگزیب
لاہور۔ 21مئی (اے پی پی) وزیراعلیٰ پنجاب شہباز شریف تون یک شنبے نا دے داڑے وزیر مملکت اطلاعات و نشریات مریم اورنگزیب اوڑدہی کرے۔ اوڑدہی ٹی قومی دودوربیدہ نا مون آ دننگ، ملکی تشخص و قومی میرات نا بحالی کن اسہ مربوط لائحہ عمل اس مرتب کننگ آ غور و دا ہیت آ امنا کننگاکہ ورنانسل انا قومی میرات و دودوربیدہ غان آگاہی المی ئِ، بے سگی و انتہاپسندی نا مقابلہ ئِ فن و دودوربیدہ نا مون آ دننگ و میرات نا رکھ اٹ کننگ آ غور آن بیدس میرات نا رکھ و دودوربیدہ نا مون آ دننگ کن جامع حکمت عملی اس ترتیب تننگ آ امنا کننگا۔ وزیراعلیٰ پنجاب داوخت آ ہیت وگپ کرساپارے کہ 2017ءنا پاکستان مستین نا مقابلہ ٹی زیات شونہال ، شون ہلوک و رکھ ئِ و وزیر اعظم محمدنواز شریف نا سروکی ٹی مسلم لیگ (ن) نا چار سالہ دور اٹی ہر بشخ اٹی نمان گچینی بسنے۔ الس نا بے لوث خذمت مسلم لیگ (ن) نا سیاست نا محور ئِ۔ اوپارے کہ پاکستان نا باشعور الس دوبہ خلنگ و دروغ انا سیاست ئِ مسترد کروک آتے آدینک ئِ نشان تسنو و منفی سیاست کروک آ عنصر آتے ہر موقع غا مسترد کرینو ، پاکستان اٹی دوبہ خلنگ نا آخا بیرہ خذمت نا سیاست مریک و خذمت ، دیانت و خواری نا سیاست 2018 ءٹی ہم سرسہب سلک و الس بروک آ گچین کاری تیٹی ہم کارکڑد نا بنداو آ وونٹ ایتک۔ اوپارے کہ وزیراعظم محمد نواز شریف نا سروکی ٹی شونداری و شونہالی نا سفر جاری و ساری سلک۔ وزیر مملکت اطلاعات و نشریات مریم اورنگزیب پنجاب نا الس نا شونداری و شونہالی کن بے مثل گام گیج آتیا وزیراعلیٰ نا کارکڑد و ویژن نا ستائِ کرسا پارے کہ نا سخت خواری و شاندار ویژن ئِ پاکستان تون اوار پیشن نادنیا ٹی ہم ستائِ کننگک وخت اس کہ نا ولولہ انگیز سروکی ٹی پنجاب ہر بشخ اٹی نمان شونداری کرینے و وزیراعلیٰ شہباز شریف نا کاریم کننگ نا غیر معمولی وڑو رفتار نا مثل ئِ ہرجاگہ غا تننگک۔ وزیر مملکت اورنگزیب سرسہب دورہ چین آ ہم وزیراعلیٰ ئِ مبارکبادی تس۔
