وزیراعظم محمد شہباز شریف نا پِر تا حالیت آتیا بنجائی و صوبائی ادارہ غاتے الرٹ سلنگ و شاری تا کمک ءِ کننگ کن غٹ وسیلہ غاتے کاریم اٹ اتنگ نا پارت

اسلام آباد۔ 01 مئی (اے پی پی) وزیراعظم محمد شہباز شریف پِرتا حالیت آتیا بنجائی و صوبائی ادارہ غاتے الرٹ سلنگ و شاری تا کمک ءِ کننگ کمن غٹ وسیلہ غاتے کاریم اٹ اتنگ نا پارت کرسا پارینے کہ الس نا جان و مال انا رکھ ءِ اولیت ایتنہ۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم نیشنل ڈیزاسٹر مینجمنٹ اتھارٹی و صوبائی ڈیزاسٹر مینجمنٹ اتھارٹیز ءِ حالیت آتا سخت چاروکی ءِ کننگ نا پارت کرینے۔ وزیراعظم پارت کرے کہ بنجائی ادارہ صوبائی حکومت و محکمہ غاتا شریداری اٹ کاریم کے، ہراڑے ہراگڑانا گرج مرے ، الس نا رکھ و کمک کن فراوان کننگے و ہراڑے گرج ءِ ہموڑے الس ءِ دمدستی رکھ علاقہ غاتیٹی گدریفنگے۔ وزیراعظم نیشنل ہائی وے اتھارٹی و ایلو تعلقدار ادارہ غاتے بین الصوبائی قومی شاہراہ تا مانیٹرنگ نا ہم پارت کرینے۔ وزیراعظم لسبیلہ ٹی کوئٹہ کراچی شاہراہ، و بولان اٹی کوئٹہ سبی شاہراہ غا ٹریفک نا روانی و الس نا آسراتی کن گچین بست وبندآتے پک کننگ نا پارت کرینے۔ وزیراعظم پارت کرے کہ چندی شاہراہ و زہمی علاقہ غاتیٹی الس ءِ خبڑدار تخنگے۔ وزیراعظم پارے کہ الس نا جان و مال انا رکھ ءِ اولیت ایتنہ۔ پِر تا حالیت آتیٹی شاری خذمت نا غٹ محکمہ غاک الرٹ مریر، قومی جوزہ و زمواری انا احساس اٹ کاریم کیر۔ وزیراعظم الس آن ہم خواست کرے کہ موسمی شدت نا حالیت آتیٹی رکھی گام گیج اختیار کیر ، و حکومتی ادارہ غاتون کمک کیر۔