حکومت نا مفت نُت اسکیم آن پنجاب ، خیبرپختونخوا ٹی اِرا کروڑ 30 لکھ آن زیات خاہوت آک فائدہ ہرفیر، شفافیت ءِ پک کننگ کن وزیراعظم تینٹ چاروکی ءِ کرے

اسلام آباد۔ 01 مئی (اے پی پی) حکومت نا کنڈآن کبینی آن زہمی الس ءِ ریلیف تننگ کن روچہ پیکج نا رداٹ پنجاب، خیبرپختونخوا و بنجائی دارالحکومت نا اِراکروڑ 30 لکھ آن زیات خاہوت آک مفت نُت اسکیم آن فائدہ ہرفیر۔ وزیراعظم محمد شہباز شریف روچہ نا مقدس آ تُو آن منہ ہفتہ مست پڑو کریسس کہ حکومت پنجاب نا 18.5 ملین خاہوت و بنجائی دارالحکومت نا 185،000 اُراتیٹی مفت نُت بشخک۔ دا اسکیم نا بناآن مست ، وزیراعظم تعلقدار کمامدارآتون پدریسہ اوڑدہی کرے تانکہ روچہ غاتا تُو اٹی حقدار بندغ آتیٹی نُت بشخنگ ءِ پک کننگ مرے۔ وزیراعظم نا پارت نا رداٹ تعلقدار کمامدارآک حقدار آتا آسراتی کن جوان  بست وبند کریر۔ انتظار گاہ تیان بیدس مخلوق نا اہلیت و بشخنگ نا عمل نا بابت راہشونی کن خصوصی معلوماتی ڈیسک اس ہم جوڑ کننگاسس۔ 25 شعبان آن بناکروک آ دا اسکیم مقدس آ تُو اناآخیریکو ہفتہ اسکان برجاسلیس۔ پنجاب اٹی نُت انا بشخنگ 8500 یوٹیلیٹی اسٹور آتون اوار اوار مچ آ صوبہ ٹی جوڑ 20،000 نُت انا ڈسٹری بیوشن پوائنٹ آتا کمک اٹ کننگا۔ پنجاب حکومت نا حساب وکتاب نا رداٹ مچ آ پنجاب اٹی کم و ود 43.93ملین نُت انا تھیلہ بشخنگا ہراڑان 17.69اُراتے فائدہ رسینگا۔ پنجاب اٹی مفت نُت انا بشخنگ بیرہ صوبہ نا رہینگوک آتسکان محدود الوکہ بلکن پنجاب اٹی رہینگوک آ کے پی ، آزاد کشمیر، گلگت بلتستان نا مخلوق ءِ ہم دا آسراتی ءِ فراوان کننگاسس۔ ہندا وڑ خیبرپختونخوا نا کم و ود 5.23ملین خاہوت حکومت نا آسودہی اسکیم آن فائدہ ہرفیر ہرا مقرر ہدف نا 90 درسد آمن زیات دوئی کرینو۔ وزیراعظم شفافیت ءِ پک کننگ و حقدار آتے جوان آسراتی کن راولپنڈی، سرگودھا، بہاولپور، لاہور، قصور، ڈیرہ غازی خان  ومظفر گڑھ تون اوار مچ آ صوبہ ٹی نُت انا بشخنگ نا ہند آتا غیر اعلانیہ دورہ ہم کرے۔ داوخت آ اومخلوق تون گپ وتران کرے، اوفتا ویل آتے بِنگ و اوفتا دمدستی ازالہ کن پارت جاری کرے۔ اونُت انا تھیلہ دوٹی تننگ آن مست حقدار آتا سرجم آتے پک کننگ نا عمل نا ہم پبی جاچ ءِ ہلک و پارت کرے کہ روچہ مبارک اٹی اسہ شاری اسےہم فریشانی اتون مون تروئی تمپ نُت  انا بشخنگ نا اسہ مرکز اسے نا دورہ ٹی اوپارے کہ پیرانگا و معذور بندغ آتا آسراتی آ خصوصی چکار کننگے، زالبول ، خاص وڑاٹ تینا چناتتون بروک آتا آسراتی کن خصوصی بست وبند کننگے۔ وزیراعظم داہیت آ زور شاغسا کرے کہ اودے بیرہ اسہ سرکاری فرض اس تکپس بلکن روچہ مبارک اٹی اللہ تعالیٰ نا خوشنودی دوئی کننگ کن انسانیت نا خذمت نا وڑاٹ کاریم کیر، وزیراعظم شہباز شریف پارے کہ 75 سال اٹی اولیکو وار مفت نُت بشخنگ انگ ءِ دُن کہ مستین اٹی سبسڈی آ نُت فراوان کننگاکہ۔ بنجائی وزیر حوالکاری مریم اورنگزیب تینا اسہ ٹویٹ اسے ٹی پارے کہ روچہ ٹی پنجاب، خیبرپختونخوا، سندھ و اسلام آباد اٹی کروڑ آ نیزگار آتے دا کبینی ٹی پورو شفافیت و ایمانداری اٹ مفت نُت فراوان مس۔ بنجائی وزیر حوالکاری پارے کہ وزیراعظم شہباز شریف تینٹ دا عمل نا چاروکی ءِ کرے، شار تا دورہ ءِ کرسا جاچ ءِ ہلک۔ وزیراعظم پارے کہ تاریخی اسکیم نا سرسہبی ٹی انتظامی آفیسر و عملہ دے و نن خواری کریر و ستاکڑزک۔ یات سلے کہ حکومت دا چرجوئی ٹی اسہ جوان ءُ آگاہی مہم اس ہم چلیفیسس، ہراٹی مخلوق ءِ پاننگاسس کہ او تینا شناختی کارڈ آ تالان اسہ ایس ایم ایس اس گدریفسا مفت نت اکن تینا اہلیت ءِ بینظیر انکم سپورٹ پروگرام نا 8717ہیلپ لائن آ گدریفیر انتئے کہ ڈیٹا بی آئی ایس پی تون گنڈوک ءِ۔آب انا رداٹ بی آئی ایس پی اتون رجسٹرڈ و 60 یا اوکان کم انا ’’پاورٹی اسکور‘‘ نا حامل نیزگار خاہوت دا آسراتی آن فائدہ ہرفنگ نا اہل ئسر۔ رجسٹرڈ خاہوت اسہ تُو اٹی 30 کلو نُت دوئی کننگ نا حقدار ئسر۔ ہروڑنا غاو انا حالیت اٹ مخلوق ءِ ٹول فری ہیلپ لائن 0800-05590آ رابطہ کننگ نا ہم مشورہ تننگا ولے ودوک آ طلب ءِ مون آ تخسا وزیراعظم اوکان گڈ پڑو کرے کہ بی آئی ایس پی نا ڈیٹا اتون رجسٹرڈ مفروک آ بندغ آک ہم بشخنگ نا ہند آتیا مخصوص ڈیسک انا کمک اٹ اسکیم آن فائدہ ہرفنگ نا اہل مریرہ۔ داگااناملک انا تاریخ نا غٹ آن بھلا پیکج نا وڑاٹ ستاءِ کننگا ہرانا شاہدی نُت انا مسُہ تھیلہ ملنگ آ دا اسکیم آن فائدہ ہرفوک آتا مون آ خوشی آن ہم پاش ئسک۔