پاک فضائیہ نا ایئر بس و سی ۔ 130 ہرکولیس جہاز سوڈان آن پاکستانی تا کشنگ اٹ لگوک ءُ، ترجمان

اسلام آباد۔ 28 اپریل (اے پی پی) پاک فضائیہ نا ایئر بس و سی۔ 130 ہرکولیس جہاز سوڈان آن جدہ نا کسر پاکستانی تا کشنگ اٹ لگوک ءُ۔ وزیراعظم پاکستان نا پارت آ پاک فضائیہ نا سروک پاک فضائیہ نا ٹرانسپورٹ فلیٹ ءِ سوڈان اٹی اختہ پاکستانی تا کشنگ نا پرمان جاری کرے۔ ترجمان پاک فضائیہ نا رداٹ پاک فضائیہ نا ایئر بس جہاز 149 مسافر آتے ہرفسا جدہ غان کراچی آ حفاظت اٹ لینڈ کرے۔ پاک فضائیہ نا سی۔ 130 جہاز پاکستانی مسافر آتے ہرفسا اینو شام آ لینڈ کیک۔ پاک فضائیہ وزارت خارجہ و سوڈان و سعودی عرب اٹی پاکستانی سفارت خانہ غاتون اوار ی اٹ اختہ مروک پاکستانی تا وطن آ پدی اتنگ کن ہرممکن کوشست کننگ ءِ۔ پورٹ سوڈان نیو انٹرنیشنل ایئر پورٹ آن ریسکیو کروک آ پاکستانی تے پاک فضائیہ نا ٹرانسپورٹ جہاز آتا کمک اٹ گدریفنگ انگ ءِ۔ پاک فضائیہ مصیبت اٹ تموک پاکستانی ایلم و ایڑھ تا حفاظت اٹ وطن آ پدی اتنگ اسکان تیناآپریشن تا چرجوئی ءِ برجاتخک۔ ریسکیو کروک آ خاہوت آک سوڈان اٹی ترندی اٹ  بگڑینگوک آ حالیت آتا نیام اٹ  وخت آ ریسکیو کننگ آ پاک فضائیہ ءِ خراج تحسین پیش کرینے۔