وزیراعظم نا یوتھ ڈویلپمنٹ پروگرام نا رداٹ ورناتیکن بامعاوضہ انٹرن شپ انا پڑو، کل ءِ دوست بس

پشاور۔ 28 اپریل (اے پی پی) بنجائی حکومت نا کنڈآن وزیراعظم نا یوتھ ڈویلپمنٹ پروگرام نا رداٹ پبلک سیکٹر ڈویلپمنٹ پروجیکٹس (پی ایس ڈی پی) سرکاری ، نجی و شونداری محکمہ غاتیٹی خیبرپختونخواتون اوار پاکستان نا ورناتیکن 60 ہزار بامعاوضہ انٹرن شپ انا پڑو کرینے۔ ’’پی ایس ڈی پی‘‘ پروگرام اٹی 20 ہزار انٹرن شپ سرکاری بشخ اٹی وخت اس کہ 40 ہزار انٹرن شپ سرکاری، نجی و شونداری محکمہ غاتیٹی تننگک ہرانا وخت ءُ پاس 6 تُو آن 1 سال انا مد اکن مریک۔ داوخت آ بڑزکو کسبی بندغ و چاہندارآتیان کاریم کننگ نا آزموندہ دوئی مریک و داکان بیدس 25 ہزار آن 40 ہزار روپئی ماہانہ اسکالر شپ ملک۔ وزیراعظم ناپیڈ انٹرن شپ پروگرام ءِ اوار مروک قبائلی ضلع غاتون اوار خیبرپختونخوا نا ورناتا کنڈآن کل ءِ دوست و جوان ءُ ردعمل اس ملانے۔ دا پروگرام نا رداٹ لکھ آ پوسکن آ گریجویٹ و ڈپلومہ ہولڈر آتیکن درکار آزموندہ دوئی کننگ نا گچین ءُ موقع اس گوندانے، وزیراعظم نا یوتھ ڈویلپمنٹ پروگرام اسہ جوانءُ ڈٹ اسے ہرافتے ٹی 15 پروگرام اوار ءِ۔ دا تاریخی پروگرام نا رداٹ بنجائی حکومت نا کنڈآن ورناتے زرگزرانی وڑاٹ واکدار کننگ کن پرائم منسٹریوتھ لیپ ٹاپ پروگرام، واکدار ورناانٹرن شپ پروگرام وخت ا س کہ بلوچستان و مسکوہی فاٹا نا طالب علم آتیکن 5 ہزار وظیفہ نا پڑو ہم کننگانے۔ پروگرام اٹی ورناچین ءِ گچین کار کسب آتیٹی مہارت دوئی کننگ نا اسہ جوان  ءُ موقع اس فراوان کرسا ورناتے ہندی و جہانی کہول آ مقابلہ کننگ کن غٹ المی مہارت آتیان شپ کننگ اٹ کمک رسینگک۔ پشاور یونیورسٹی نا پوسٹ گریجویٹ طالب علم احتشام نصیر اے پی پی تون گپ وتران کرسا پارے کہ وزیراعظم نا بامعاوضہ انٹرن شپ پوسکن آ گریجویٹ و ڈپلومہ ہولڈر آتیکن پیشن نا ملک ملازمت آتیان بیدس عملی آزموندہ و تینا گچین کسب آتیٹی مہارت دوئی کننگ نا جوان ءُ موقع اسے۔ اوپارے کہ نوشہرہ و پشاور ضلع غاتیان تعلق تخوک آ بھاز انگا گریجویٹ و ڈپلومہ ہولڈر آک انتظامیہ ءِ درخواست تسنو۔ سرکاری و نجی بشخ آتیٹی گریجویٹ و ڈپلومہ ہولڈر آتا گیشتر نا درخواست آتے کسبی آزموندہ و مہارت آتا کمتی نا سوب آن مسترد کننگا۔ انٹرن شپ پروگرام نئے بیرہ پوسکن آ گریجویٹ آتے تعلقدار کاریم اٹی آزموندہ بلکن اوفتے عزت اٹ زند ءِ تیر کننگ کن جوان معاوضہ ہم فراوان کیک۔ احتشام نصیر پارے کہ وزیراعظم محمد شہباز شریف بامعاوضہ انٹرن شپ پروگرام نابناءِ کننگ آ نن وزیراعظم نا منت وار اُن انتئے کہ داپروگرام نا رداٹ خیبرپختونخوا تون اوار ملک انا لکھ آ ورناگریجویٹ و ڈپلومہ ہولڈر آتے فائدہ ملک۔ شہریارزمان اسہ پین گریجویٹ و واپڈا ٹاؤن نوشہرہ نا ہنکینی ہم انٹرن شپ پروگرام تون بھلو اومیت اس وابستہ کرینےو اوداپروگرام آن پبی فائدہ ہرفنگ نا است خواہی کرینے۔ خیبرپختونخوا پاکستان مسلم لیگ (ن) نا ترجمان و مسکوہی صوبائی اسمبلی نا باسک، اختیار ولی خان اے پی پی تون گپ وتران کرسا پارے کہ وزیراعظم نا یوتھ ڈویلپمنٹ پروگرام ورناتا شونداری نا گام گیج آتا رداٹ وزارت ڈٹ بندی، شونداری و خصوصی گام گیج آتا رداٹ بناکننگاسس تانکہ ملک انا آبادی نا 64 درسد آن زیات ورناتے وارخواہی فراوان مننگ کے۔ اوپارے کہ وزیراعظم نایوتھ ڈویلپمنٹ پروگرام پاکستان نا ورنابشمول مسن تے پوسکن و فنی تعلیم آن روشناس کننگ و واکدار کننگ کن بناکننگانے۔ اوپارے کہ وزیراعظم نا یوتھ ڈویلپمنٹ پروگرام ساڑی آ سیوتی حکومت نا بھلا سرسہبی تیان اسٹ ءِ ہرانا مسخت تعلیمی ، سیاسی وابستگی، ذات پات و خاہوتی پس منظر آن قطع نظر ورناتے زرگزرانی و مالی وڑاٹ واکدار کننگ ءِ۔ اوپارے کہ میرات اٹی ملوک آ سخت زرگزرانی و سیاسی چیلنج آتیان پد ہم وزیراعظم محمد شہباز شریف ورناتا شونداری و زرگزرانی لحاظ اٹ ورناتے واکدار کننگ نا تاریخی پروگرام نا سرسہبی اٹ بناءِ کرینے۔ ہرانا رداٹ ’’ٹیلی اسکول پاکستان ایپ‘‘، گوگل فارایجوکیشن و ڈیجیٹل کنٹینیوس پروفیشنل ڈویلپمنٹ تون اوار چندی سروس آتا بناءِ کننگانے۔