اسلام آباد۔ 27 اپریل (اے پی پی) وزیراعظم محمد شہباز شریف و چینی وزیراعظم ہڑتوم آملک آتا نیام اٹ غٹ بشخ آتیٹی کمکاری ءِ ودفنگ آ امنا کرینو تانکہ علاقائی امن، شونہالی و سوگوی ٹی تینا کڑد ءِ ادا کننگ تون اوار اوار تینا ملک آتا مخلوق ءِ فائدہ تننگ نا اسیجائی مسخت آتے دوئی کننگ مرے۔ پنچ شنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف و چین نا وزیراعظم لی چھیانگ نا نیام اٹ ٹیل فون آ گپ وتران مس، دا گپ وتران روایتی گرم جوشی و ہم گرنچی آ تالان ئسک ہراٹی پاک چین سدا بہار سٹریٹجک کوآپریٹو پارٹنر شپ ءِ تالان کننگا۔ شہباز شریف چینی وزیراعظم ءِ دا عہدہ کن اونا ساڑی آ گچین کاری تیا مبارکبادی تس ہرا چینی قوم انا پت و السی خذمت اٹی اونا بھاز انگا سرسہبی تیان ودی مروک آ اوڑا پت انا ڈیک ءِ ایتک۔ سدابہار شریدار و خڑکی سنگت آتا حیثیت اٹ پاکستان چین نا پرامن شونداری ءِ جہانی امن و سوگوی نا مثبت عنصر نا وڑاٹ ستاءِ کرے و داہیت آ یقین ظاہر کرے کہ چین شونداری و بحالی نا کنڈا تینا سفراٹی اہم ءُ مزل دوئی کرسا کیک۔ وزیراعظم چین نا بنداوی ویل بشمول ’’ون چائنا‘‘ پالیسی، توائیوان، تبت، سنکیانگ ، ہانگ کانگ و بحیرہ سویلی چین آ پاکستان نا پبی مخ تفی نا درشانی ءِ کرے۔ اوجموں وکشمیر نا جھیڑہ غا چین نا اصولی موقف و بنداوی ویل آتیا پاکستان نا مخ تفی آ چین نا است انا حب اٹ منت واری ءِ ہرفے۔ چینی وزیراعظم چین اکن پاکستان نا مخ تفی نا ستاءِ کرے و پاکستان نا قومی شونداری، وتواجہی و علاقائی سالمیت کن چین نا مخ تفی ءِ برجاتخنگ نا درشانی ءِ کرے۔ اوپارے کہ سدابہار سنگت نا حیثیت اٹ چین پاکستان تون ہروخت سلک۔ نومبر 2022اٹی وزیراعظم نا دورہ ءِ چین و صدر شی جن پنگ و چینی کماش آتون گیشتر گپ وتران ءِ یات کرسا، ہڑتوم آ راہشونک سی پیک تون اوار اہم بشخ آتیٹی ہڑتوم آ کنڈآتا کمکاری نا جاچ ءِہلکر۔ اوغٹ بشخ آتیٹی تینا کمکاری ءِ ودفنگ آ امنا کریر تانکہ علاقائی امن، شونہالی و سوگوی ٹی تینا کڑد ءِ ادا کننگ تون اوار اوار تینا ملک آتا مخلوق ءِ فائدہ تننگ نا اسیجائی مسخت آتے دوئی کننگ مرے۔
