اسلام آباد۔ 27 اپریل (اے پی پی) چیئرمین سینیٹ محمد صادق سنجرانی تون چینی زرکارآتا ڈل اوڑدہی کرے ہراٹی ملک اٹی زرکاری نا وارخواہی تا بارواٹی گپ وتران کننگا۔ پنچ شنبے نادے آ سینیٹ سیکرٹریٹ آن جاری بیان نا رداٹ ڈل ہڑتوم آ کنڈآتا تعلقداری تے مون آ دننگ و پاکستان اٹ چینی زرکاری ءِ ودفنگ نا است خواہی نا درشانی ءِ کریر۔ ڈل پاکستان اٹی چندی بشخ خاص وڑاٹ انفارمیشن ٹیکنالوجی ، انفراسٹرکچر و ایلو بشخ آتیٹی زرکاری ٹی است خواہی نا درشانیءِ کرے۔ چیئرمین سینیٹ ڈل ءِ بخیر کرے و اوفتے زرکاری ٹی آسراتی فراوان کننگ کن حکومت و تینا پبی کمکاری نا باوری کرفے۔ اوبلوچستان و خاص وڑاٹ گوادر ءِ زرکاری کن جوان گوندسا ڈل ءِ صوبہ ٹی زرکاری نا سلہ خلک۔ چینی زرکارآک پاکستان نا سٹریٹجک محل و وقوع و واپار و زرکاری نا اسہ مرکز اسے نا وڑاٹ اونا لائخی نا ستاءِ کریر۔ ہڑتوم آ فریق آک کمکاری و زرکاری نا پین وارخواہی پٹنگ آ امنا کریر۔ ڈل پاکستان ءِ آخبت اٹ زرکاری کن اسہ پرکشش ءُ ہند اس گوندسا پت انا درشانی ءِ کرے۔ چینی زرکارآتا ڈل مسٹرلین، مسٹرڈین ومسٹر جوئے آ تالان ئسک۔ اوڑدہی ٹی چیئرمین سینیٹ نا سلاہکار سید عابد حسن ہم ساڑی ئسک۔
