اسلام آباد۔ 27 اپریل (اے پی پی) بنجائی وزیر ڈٹ بندی و شونداری پروفیسر احسن اقبال پارینے کہ حکومت ڈیجیٹل ٹیکنالوجی ٹی زرکاری ءِ اولیت تننگ ءِ، ڈیجیٹل ٹیکنالوجی ٹی چاہندا رورناک ننا میرات آک ءُ، 2018 آن پد شونداری نا سفر ءِ پن انا بدلی آن توننگا۔ داخیال آتا درشانی ءِ او پنچ شنبے نادے آ داڑے ڈیجیٹل ایکسپورٹس اٹی گچینی اتنگ نا بابت دیوان نا کماشی ءِ کرسا کرے۔ دیوان اٹی آئی ٹی و ٹیلی کام سیکٹر تون وابستہ سٹیک ہولڈر آک بشخ ہلکر۔ بنجائی وزیر پارے کہ حکومت ڈیجیٹل ٹیکنالوجی ٹی زرکاری ءِ اولیت تننگ ءِ۔ غٹ زند انا بشخ آتے ڈیجیٹل ٹیکنالوجی تون گنڈنگ المی مسنے، برآمد آتیٹی ودکی ملکی زرگزرانی ویل آتا اسٹ انگا ایسر ءِ۔ اوپارے کہ ڈیجیٹل ٹیکنالوجی ٹی چاہندار ورناک ننا میرات آک ءُ، ڈیجیٹل ایکسپورٹ اٹی ودکی کن ورناتے تیار کننگ ننا اولیت ءِ ۔ احسن اقبال پارے کہ وژن 2025نا روڈ میپ مون آ بروک آ ٹیکنالوجی تے مون آ تخسا شین تننگا، 2018 آن پد شونداری نا سفر ءِ پن انا بدلی آن توننگا، سیاسی سوگوی آن بیدس شونداری مننگ کپک۔ اوپارے کہ ننا تدوک آ دور ءِ حکومت نا چار سال آتیٹی ریکارڈ 3200 ارب روپئی نا شونداری ڈٹ آک پورو مسر۔ بنجائی وزیر ڈیجیٹل ایکسپورٹس نا بابت سلاہ و سوج آتیا عملدرآمد و پیش رفت نا جاچ ءِ ہلنگ کن سٹیئرنگ کمیٹی اس جوڑ کننگ نا پارت کرسا پارے کہ ہندا کمیٹی ہرتُو سلاہ و سوج آتیا عملدرآمد نا جاچ ءِ ہلیک۔
