اسلام آباد۔ 27 اپریل (اے پی پی) وزارت ریلوائی کراچی ایکسپریس اٹی خاخر لگنگ نا واقعہ نا نوٹس ءِ ہلسا جاست وپاست نا پرمان کرے۔ وزارت نا کنڈآن جاری بیان نا رداٹ کراچی آن لاہور آ ہنوک آ کراچی ایکسپریس نا اے سی بزنس کوچ اٹی 26 و 27 اپریل نا نیامی نن 12 ءُ نیم بجہ غا خاخر لگنگ نا حوال ملا ہراڑا دمدستی وڑاٹ ٹرین ءِ ٹنڈو مستی خان اسٹیشن نا خڑک آ توننگا۔ واقعہ نا حوال ملنگ آ ڈی ایس سکھر ، ڈی سی او سکھر و ایلو ریلوائی آفیسر آک و فائر بریگیڈ نا گاڈی موقع غا سرمسر و کم و ود 40 منٹ آن پد خاخر نا مون ءِ توننگا و زہمی کوچ ءِ جتا کننگ آن پد کراچی ایکسپریس ءِ پونے 7 بجہ غا مزل نا کنڈا روانہ کننگا۔ وزارت ریلوائی واقعہ نا سخت نوٹس ءِ ہلسا جاست وپاست نا پرمان کرینے۔ دا رداٹ فیڈرل گورنمنٹ انسپکٹر آف ریلوائی نا کماشی ٹی ٹیم واقعہ نا جاگہ کن روانہ مسنے۔ جاست وپاست پورو مننگ آ میڈیا ءِ معلومدار کننگک۔
