اسلام آباد۔ 27 اپریل (اے پی پی) چیئرمین سینیٹ محمد صادق سنجرانی پارینے کہ پاکستان نا خاطر نن غٹ اسٹ اُن، پارلیمان سیاسی ویل آتا ایسری کن جوان ءُ فورم اسے۔ پنچ شنبے نادے آ سینیٹ سیکرٹریٹ آن جاری بیان نا رداٹ چیئرمین صادق سنجرانی باقاعدہ سیاسی رابطہ غاتا بناءِ کرینے ہراڑکن خصوصی کمیٹی اس جوڑ کرینے۔ چیئرمین سینیٹ اٹی قائد ایوان سینیٹر اسحاق ڈار و قائد حزب اختلاف سینیٹر ڈاکٹر شہزاد وسیم ءِ جتا جتا چٹھی راہی کرینے ہرافتے ٹی پاننگاکہ کمیٹی کن حکومت و اپوزیشن بنچ آتیان چار چار بندغ آتے پن کننگے، ساڑی سیاسی و زرگزرانی حالیت آتیٹی سیاسی جماعت آتا نیام اٹ رابطہ نا کمتی ءِ۔ اوپارے کہ کنتون حکومت زرگزرانی و سیاسی بحران بشمول لس گچین کاری تا اڈتننگ آمذاکرات نا بناءِ کننگ و کمکاری فراوان کننگ کن رابطہ کرینے۔ اوپارے کہ سینیٹ نا باسک آتیا تالان کمیٹی اس جوڑ کننگ نا سلاہ تننگانے، پارلیمان سیاسی ویل آتا ایسری کن جوان ءُ فورم اسے، ای دا اہم آ زمواری ءِ سنبھالانٹ۔ محمد صادق سنجرانی پارے کہ قائد ایوان و قائد حزب اختلاف نا اسیجائی کنوینر شپ اٹی سیاسی مذاکرات کن دہ باسک آتیا تالان پارلیمانی کمیٹی اس جوڑ کننگ انگ ءِ ، حکومت و اپوزیشن آن چارچار باسک کمیٹی نا بشخ مریرہ، 2 دے انا تہہ ٹی اپوزیشن وحکومتی بنچ آتیان 4 باسک کمیٹی کن پن کننگے۔ چیئرمین سینیٹ آفس و سینیٹ سیکرٹریٹ کمیٹی نا کمکاری کن دستیاب مریرہ، پاکستان نا خاطر نن غٹ یکجااُن۔
