اسلام آباد۔ 27 اپریل (اے پی پی) وزیر مملکت و پیپلزپارٹی خیبرپختونخوا ناقائم مقام صدر محمد علی شاہ باچا پارینے کہ عمران خان نا سیاست دوبہ خلنگ، بے شرفی کننگ ، درو و دروغ آن بیدس ہچ اس اف، عمران خان تینے مقدس و کانود آن ایڑترتکک، تحریک انصاف نا حکومت ملکی زرگزرانی حالیت آتے بھسکاری نا دنگ آ سرکرے، عمران خان راستکی تے لتاڑسا مخلوق ءِ اڑیفک، عمران خان ملک اٹی بے چیٹی و پھسات تالان کننگ نا علمبردار ءِ۔ عمران خان نا اصل دروشم بے نقاب مسنے، الس جعلی بیانیہ و یوٹرن آ اونا احتساب ءِ کیک۔ چارشنبے نادے آ تینا اسہ بیان اسے ٹی اوپارے کہ پی ٹی آئی نا خار انا سیاسی کلچر ءِ قوم مسترد کرینے انتئے کہ پی ٹی آئی نا اقتدار نا سوب آن بحران و ویل آتیان قوم فریشان ءِ۔ اوپارے کہ عمران خان نا بے چیٹی، کرینگ ، دوبہ خلنگ ، خار و بشخنگ نا وژن آن قوم جوان بلد ءِ ، عمران خان تینٹ آئین، کانود وعدلیہ نا توہین ءِ کرسا الس ءِ اخلاقیات، آجوئی و کانود نا حکمرانی نا درس تف، او تینا دا دوہرا معیار ءِ بند کے، عمران خان نا لاپرواہی تا بھرم ءِ قوم سگنگ ءِ، تحریک انصاف نا مسکوہی حکومت نا پالیسی تا سوب آن ملک ءِ ساڑی زرگزرانی حالیت و کبینی مون تروک ءِ، اگہ ساڑی حکومت اقتدار ءِ سنبھالپروسس تو حالیت آک پین خراب و ناقابل تلافی مسرہ۔ اوپارے کہ پی ٹی آئی چیئرمین نا سیاست تینا فائدہ کن ءِ ہرا زمان پارک انا خاطر خلنگ ءِ بروک آ لس گچین کاری تیٹی پی ٹی آئی نا ٹکٹ دوئی کننگ نا اسٹ انگا اہلیت گوندانے۔ اوپارے کہ دا بے کچ بدبختی نا ہیت اسے کہ خیبرپختونخوا نا الس اسہ ہندن ءُ لیڈر اسے تون تفے ہرا تینٹ تینا ڈرائنگ روم اٹی آرام کننگ ءِ و تینا سیاسی کارندہ غاتیان قربانی خواہنگ ءِ۔
