اسلام آباد۔ 27 اپریل (اے پی پی) اسلامی کمکار تنظیم (اوآئی سی) نا باسک ملک آتیٹی روایتی دوائی و اوڑتون گنڈوک بائیو میڈیکل سائنسز اٹ کمکاری ءِ سوگو کننگ کن چینی سائنسدان و صنعت کار آتا اسہ بڑزکو کہول انا ڈل اس پاکستان نا دورہ نا وخت آ پنچ شنبے نادے آداڑے کامسٹیک سیکرٹریٹ اٹی اسہ دود اسے ٹی بشخ ہلکر۔ دودآن کامسٹیک نا کوآرڈی نیٹر جنرل ڈاکٹر ایم اقبال چوہدری، چین نا سائنسدان ، چاہندار و ایلو ترانکار آک تینا خیال آتا درشانی ءِ کریر۔ چینی صنعت کار و سائنسدان تا ڈل ءِ ملکی و درملکی چاہندار آک کامسٹیک اٹی مروک آ دود اٹی بشخ ہلوک آتے پاکستانی ادارہ و اسلامی کمکار تنظیم (اوآئی سی) نا باسک ملک آتیٹی روایتی دوائی و اوڑتون گنڈوک بائیو میڈیکل سائنسز اٹ کمکاری ءِ سوگو کننگ کن کروک آ کوشست آتیان معلومدار کریر۔ دود اٹی او آئی سی نا گڑاس باسک ملک آتا سفیر، وزارت خارجہ نا آفیسرآک ، چینی سفارتکارآک ، یونیورسٹی تا وائس چانسلر آک و چندی ادارہ غاتا سروک آک ہم ساڑی ئسر۔ چین نا ڈل انا اسلامی کمکار تنظیم نا ذیلی اارہ کامسٹیک اٹی اڈ ہلوک دود اٹی بشخ ہلنگ نا بنداوی مسخت ادارہ جاتی و صنعتی رابطہ غاتا کمک اٹ قدرتی مصنوعات، بائیو ٹیکنالوجی ، مالیکیولرو سیل بائیو لوجی و روایتی دوائی تا بشخ آتیٹی پٹ وپول و شونداری ٹی کمکاری ءِ مون آ دننگ کن مفاہمت ءِ ودفنگ ءِ۔
