کوئٹہ۔ 27 اپریل (اے پی پی) فوکل پرسن ورکرز ویلفیئر بورڈ اسکولز و پاکستان پیپلزپارٹی بلوچستان زالبول ونگ انا نائب صدر ماہ جبین خالد جمالی پارینے کہ پاکستان نا غٹ سیاسی جماعت آک ہر چار آ صوبہ غاتیٹی اسہ ہی دے گچین کاری کرفنگ آ امنا ءُ ملک انا حالیت جتا جتا گچین کاری کرفنگ نا موکل تفک، پی ٹی آئی ملک اٹی بے چیٹی و ہڑدڑ تالان کننگ نا ناپاک سازش آتیٹی لگوک ءِ ہرادے پاکستان پیپلزپارٹی نا جیالہ غاک بے سہب کیرہ۔ داہیت ءِ او پنچ شنبے نادے آتینا ہنکین آ اوڑدہی کروک آ زالبول آتا اسہ ڈل اسے تون گپ وتران کرساپارے۔ ماہ جبین خالد جمالی پارے کہ پاکستان تحریک انصاف سیاسی ءُ جماعت اس اف بلکن اودے پاکستان اٹی ہڑدڑ تالان کننگ و نزوری کن لانچ کننگانے ولے پاکستان پیپلزپارٹی پی ٹی آئی نا ملک دشمن سازش آتے اسُل سرسہب مننگ کن الیپک۔ اوپارے کہ عمران خان و اونا ٹولی اول آئین شکنی کرسا قومی اسمبلی تے تحلیل کریر اوکان پد پنجاب و خیبرپختونخوا اسمبلی تے تحلیل کریر ہرافتا ہچ ءُ جواز اس الوکہ۔ اوپارے کہ مسکوہی حکومت نا ہیبدار پالیسی تا سوب آن ملک داوخت آ اِراصوبہ غاتیٹی گچین کاری تے سگنگ کپک غٹ سیاسی جماعت آک داہیت آ متفق ءُ کہ ہر چار آ صوبہ و قومی اسمبلی نا گچین کاریک تینا تخوک آ وخت آ ہی مریر ولے پی ٹی آئی اِرا صوبہ غاتیٹی گچین کاری تیا ضد اٹی ءِ۔ اوپارے کہ پاکستان تحریک انصاف و اونا ٹولی ملک اٹی نزوری ودی کننگ ناناپاک سازش کرینے ہرادے الس بے سہب کرے۔ اوپارے کہ پاکستان پیپلزپارٹی نا سرکڑدہ و جیالہ غاک ملک اٹی جمہوریت و آئین نا بالادستی کن تینا جون تے ندر کرینو ، کس اسے جمہوریت و آئین نا برخلاف سازش کننگ نا موکل تفنہ۔
