کوئٹہ۔ 27 اپریل (اے پی پی) بلوچستان عوامی پارٹی نا مرکزی راہشون و مسکوہی صوبائی وزیر ثوبیہ کرن کبزئی پارینے کہ ملک اٹی ساڑی آ دہشت گردی نا ریسہ ملک ءِ نزوری آن دوچار کننگ نا بےسہب کوشست اسے ہرادے الس و سیکورٹی ادارہ غاک اواری اٹ بے سہب کیرہ، جیکب آباد اٹی آپریشن اٹی پولیس کارندہ غاتا شہیدی و خضدار اٹی سی ٹی ڈی تھانہ نا ایس ایچ او نا گاڈی آ جلہو نا اخس کہ مذمت ءِ کننگے کم ءِ۔ داڑے جاری مروک اسہ بیان اسے ٹی ثوبیہ کرن کبزئی پارے کہ جیکب آباد نا علاقہ ٹی برمتہ مروک آنا بازیابی کن چھاپہ خلوک آ پولیس کارندہ غاتیا سم کاری ٹی پولیس کارندہ غاتا شہیدی و ٹھپی مننگ نا واقعہ نا اخس کہ مذمت ءِ کننگے کم ءِ۔ اوخضدار نا علاقہ ٹی سی ٹی ڈی تھانہ نا ایس ایچ او شربت خان نا گاڈی آ ریموٹ کنٹرول بمب جلہو نا مذمت ءِ کرسا پارے کہ دہشت گرد آک تینا درملکی آقاتے خوش کننگ وملک اٹی نزوری ودی کننگ کن دہشت گردی نا کارروائی تیٹی لگوک ءُ ولے پاکستان نا الس و سیکورٹی ادارہ غاک اواری اٹ دہشت گرد آتا ناپاک عزم آتے مش تا کیرہ۔ اوپارے کہ الس نا جان و مال انا رکھ اکن تینا جون تے ندر کروک آ پولیس و سیکورٹی ادارہ غاتا کارندہ غاک ننا پیشانی نا جھومر آک ءُ اوفتا قربانیک زیان مفسہ و انشاء اللہ زوت ملک آن دہشت گرد آتے چٹفنگک ۔ اوسم کاری و دھماکہ ٹی شہید مروک آ پولیس کارندہ غاتا خاہوت تون ہڑزخواہی و ہمدردی و ٹھپی تا زوت دراخ جوڑی کن دعاکرے۔
