حج بست وبند آتا وخت آ پوروی کن دے و نن کاریم کروئی مریک، بنجائی وزیر مذہبی امور

اسلام آباد۔ 26 اپریل (اے پی پی) بنجائی وزیر مذہبی امور سینیٹر محمد طلحہٰ محمود وزارت مذہبی امور ءِ پارت کرینے کہ حج بست وبند آتا وخت آ پوروی کن دے ونن کاریم کروئی مریک، حاجی تے آسراتی تا فراوانی نا بابت ہچ ءُ سمجھوتہ اس کننگپک۔ چارشنبے نادے آ وزارت مذہبی امور اٹی تینا کماشی ٹی مروک آ حج بست وبند آتیا گپ وتران کرسا اوحج بست وبند آتا بابت تینا ساڑی آ دورہ ءِ سعودی عرب اٹی مروک آ اوڑدہی تا بارواٹی دیوان ءِ معلومدار کرے۔ اوپارے کہ حاجی تے آسراتی تا فراوانی آ ہچ ءُ سمجھوتہ اس کننگپک و حج مقدس اٹی پاکستانی حاجی تیکن بست وبند آتے گچین وڑاٹ گڈیکو دروشم اس تننگ نا خواہندار اُن۔ اووزارت مذہبی امور ءِ پارت کرے کہ حج بست وبند آتا وخت آ پوروی کن دے ونن کاریم کروئی مریک۔ داکان بیدس سیکرٹری مذہبی امور آفتاب اکبر درانی دیوان ءِ حوال ترساپارے کہ حج انا فرض ءِ ادا کننگ کن حاجی تے حج مقدس روانہ کننگ کن حج بست وبند آتیا ترندی اٹ پیش گامی برجاءِ۔ حاجی تا بائیو میٹرک 28 اپریل اسکان پورو مریک۔ حاجی تیان اوفتا کارآمد پاسپورٹ ہم 28 اپریل اسکان بٹنگ انگانے۔ اوپارے کہ ملک انا غٹ 10 حاجی کیمپ آتا بست وبند اٹی مناسک حج و انتظامی امور نا تربیت نا بناپنچ شنبے 27 اپریل آن بناکیک۔ اوپارے کہ تحصیل و ضلع نا کہول آ اڈ ہلوک حج تربیت اٹی بشخ ہلنگ غٹ حاجی تیا المی ءِ۔ اوحوال اٹی پارے کہ گمان ءِ کہ 20 مئی آن حج جہاز آتا بنامریک۔ اوپارے کہ پاکستان آن آخیریکو حج جہاز 21 جون آ روانہ مریک۔