وزیرخزانہ نا کماشی ٹی دیوان، نیلورہائٹس۔1 پروجیکٹ نا بیلٹنگ 8 مئی آن مست پورو کننگ نا پارت

اسلام آباد۔ 26 اپریل (اے پی پی) بنجائی وزیر خزانہ و محصولات سینیٹر محمد اسحاق ڈار ملک انا زرگزرانی و مالیاتی شونداری ٹی سمندر پار پاکستانی تا اہمیت ءِ تالان کرسا سی ڈی اے کمامدارآتے پارت کرے کہ نیلو رہائٹس 1۔ پروجیکٹ نا بیلٹنگ 16 مئی 2023 ء نا جاگہ غا 8 مئی 2023 آن مست پورو کرفنگے۔ داپارت ءِ او چارشنبے نادے آتینا کماشی ٹی فنانس ڈویژن اٹی سی ڈی اے نا سمندر پار پاکستانی تا ڈٹ آتا بارواٹی دیوان اٹی تس۔ دیوان اٹی وزیراعظم نا خصوصی سلاہکار خزانہ طارق باجوہ ، وزیراعظم نا خصوصی سلاہکار ریونیو طارق پاشا ، سیکرٹری خزانہ ، چیئرمین سی ڈی اے، ممبر (پلاننگ اینڈ ڈیزائن) سی ڈی اے، و فنانس ڈویژن و سی ڈی اے نا سینئر آفیسر آک ساڑی ئسر۔ دیوان اٹی سی ڈی اے نا کنڈآن خاص وڑاٹ سمندر پار پاکستانی تیکن کروک آ شونداری ڈٹ آتیا پیش رفت نا جاچ ءِ ہلنگا۔ دیوان اٹی پیدوار کننگاکہ سی ڈی اے سمندر پار پاکستانی تیکن گونڈ مدتی و نیامی مد انا ہنکینی ڈٹ آتا بناءِ کرینے۔ پاننگاکہ دافتیان اسہ ہاؤسنگ پروجیکٹ نیلو رہائٹس ۔ ون پوروی نا ریسہ غاتیٹی ءِ و 2000 فلیٹ آتیکن 81 ملک آتیان 6000 آن زیات درخواست دوئی مسنے۔ وزیرخزانہ سینیٹر محمد اسحاق ڈار ملک انا زرگزرانی و مالیاتی شونداری ٹی سمندر پار پاکستانی تا اہمیت آ زور شاغا و سی ڈی اے نا کمامدارآتے پارت کرے کہ سمندر پار پاکستانی تیکن شونداری ڈٹ آتے ترندی اٹ مون آ دننگے۔ اوسی ڈی اے کمامدارآتے پین پارت کرے کہ نیلورہائٹس 1۔ پروجیکٹ ہراکہ خاص وڑاٹ سمندر پار پاکستانی تیکن تیار کننگانے، نا بیلٹنگ ءِ 16 مئی 2023 نا جاگہ غا 8 مئی 2023 آن مست پورو کرفنگے۔ دیوان اٹی سمندر پار پاکستانی تیکن کھلی نیلامی نا بنداو آ کمرشل و ہنکینی پلاٹ آتا فراوانی نا بارواٹی حوال تننگا و معلومدار کننگاکہ بروک آ ریسہ ٹی سمندر پار پاکستانی تیکن C-14و C-16سیکٹر آتیٹی پلاٹ آتا رجسٹریشن نا بناءِ کننگک و سی ڈی اے ٹی سمندر پار پاکستانی تا آسراتی کن خاص آسرات ڈیسک اس جوڑ کننگانے۔ وزیرخزانہ پارت کرے کہ کمرشل پلاٹ آتا نیلامی کن امریکی ڈالر اٹی زر ادا کروک آ زرکارآتے آسراتی تننگے تانکہ زرمبادلہ نا کوڑی تے پین سوگوی تننگ مرے۔ وزیرخزانہ سی ڈی اے ءِ پین پارت کرے کہ بہا و ہلنگ نا عمل اٹی زرکارآتیکن الس دوست و شفاف نظام ءِ برقرار تخنگے ودامسخت کن تیار کروک آ ڈیجیٹل پلیٹ فارم  ءِ کاریم اٹ اتسا سی ڈی اے کمامدار و پیشن نا ملک رہینگوک زرکارآتا نیام اٹ بالمشافہ رابطہ ءِ کم آن کم کننگے۔ اومستی پارے کہ کُری و اوورسیز انکلیو نا ڈٹ آتیا کاریم ءِ ترند کننگے و سمندر پار پاکستانی تیکن مئی 2023 نا نیام اسکان C-14و C-16سیکٹر آتیٹی پلاٹ آتا نیلامی نا اسکیم تیار مرے۔