راولپنڈی ۔ 26 اپریل(اے پی پی) پاک فوج انا سروک جنرل سید عاصم منیر نا چین انا پیپلز لبریشن آرمی ہیڈ کوارٹر آ سرمننگ آ اودے جم و جوش اٹ بخیر کننگا، اوہموڑے چین انا فوجی سرکڑدہ غاتون اوڑدہی کرے ہراٹی ڈیہہ ٹی امن و سوگوی ءِ برقرار تخنگ و فوجی کمکاری ءِ ودفنگ نا گرج انا درشانی ءِ کننگا۔ آئی ایس پی آر آن جاری بیان نا رداٹ پاک فوج انا سروک جنرل سید عاصم منیر چین نا سرکاری دورہ نا اولیکو دے آ پیپلزلبریشن آرمی ہیڈ کوارٹر اٹی گارڈ آف آنر پیش کرسا جم وجوش اٹ بخیر کننگا۔ داوخت آ آرمی چیف چینی فوج انا چاق و چوبند دستہ نا جاچ ءِ ہلک و اوفتا پی ایل اے آرمی نا کمانڈر تون سرجم اوڑدہی مس ہراٹی تین پہ تینی سلامتی نا امور و فوجی کمکاری آ گپ وتران کننگا۔ ہڑتوم آ فوجی کمانڈرآک ڈیہہ ٹی امن و سوگوی ءِ برقرار تخنگ و فوجی کمکاری ءِ ودفنگ نا گرج انا درشانیءِ کریر۔ آرمی چیف پی ایل اے آرمی نا دستہ غاتا آپریشنل لائخی تا درشانی ءِ ہم ہرا۔ اوتربیت نا بڑزکو آب و فوجی تا کنڈآن نشان تروک آ کسبی مہارت نا ستاءِ کرے۔ آرمی چیف ہڑتوم آ ملک آتا فوج انا نیام اٹ متکن آ تعلقداری تے ودفنگ کن چین اٹی فوجی راہشون تتون پین اوڑدہی کیک۔ یات سلے کہ دا بنائی اوڑدہیک آرمی چیف انا چین نا چار دے ئی دورہ نا بشخ ءُ۔
