اسلام آباد۔ 26 اپریل (اے پی پی) وزیراعظم شہباز شریف نا حکومت سروس ڈیلیوری نا تینا ساکھ ءِ برقرار تخسا تینا اولیکو سال اٹی 3000 میگاواٹ آن زیات بجلی نیشنل گریڈ اٹی اوار کرے۔ وزیراعظم 11 اپریل 2022 آ عہدہ ءِ سنبھالنگ آن پد آن پاکستان ءِ توانائی نا بشخ اٹی خودانحصاری نا کنڈا دننگ کن تینا زمورای تے پورو کرسا بھلو پیش رفت اس کرینے۔ دوئی حساب وکتاب نا رداٹ او تدوک آ اسہ سال اٹی پنچ اہم بجلی گھر تا بناءِ کرے ہراڑان ملک انا توانائی نا ودوک آ گرج آتے پورو کننگ نا کوشست اٹی 3150 میگاواٹ توانائی نیشنل گریڈ اٹی اوار کننگا۔ داہیت پیدوار ءِ کہ باسنی تیٹی پاکستان نا توانائی نا گرج آتیٹی خاطرخواہ ودکی مریک و طلب و رسد نا پرخ ہزار آ میگاواٹ اسکان ودک۔ وزارت توانائی نا حساب وکتاب نا رداٹ تدوک آ سال اگست اٹی بجلی نا رسد 20500 میگاواٹ نا مقابلہ ٹی طلب 28 ہزار میگاواٹ اسکان سرمسوسس ہندا سوب آن ساڑی آ حکومت باسنی تیٹی بجلی نا بحران ءِ توننگ کن کولا کون آ توانائی نا ہندی وسیلہ غاتا شونداری آ چکار کننگ اٹی ءِ۔ وزیراعظم تدوک آ تُو تیٹی سندھ انا تینا دورہ غاتیٹی تھرپارکر اٹی کولاآ تالان 1980 میگاواٹ نا مسہ پاور پروجیکٹ آتا بناءِ کرے۔ دا ڈٹ آتے چین ۔پاکستان اقتصادی راہداری (سی پیک) ڈٹ آتا رداٹ چین نا کمک اٹ پورو کننگا۔ دا ڈٹ آتیٹی تھرانرجی نا 330 میگاواٹ نا پاور پلانٹ، مٹھی ٹی 330 میگاواٹ نا تھل نووا پاور پلانٹ و تھرا ٹی 1320 میگاواٹ نا شنگھائی الیکٹرک پاور پلانٹ اوار ءُ۔ کولاآن چلینگوک آ پاور پلانٹ آک ہرسال کم و ود 15 ارب یونٹ کم خڑچ انا بجلی ودی کیرہ۔ حکومت تھر انا 175 بلین ٹن کولانا کوڑی تیان فائدہ ہرفنگ نا خواہندار ءِ و توانائی نا چاہندار آتا رداٹ اگہ دا کوڑی تے سہی وڑاٹ کاریم اٹ اتنگے تو دا بروک آ 300 سال اسکان ملک انا بجلی نا گرج آتے پورو کننگ کن گنج اس مریرہ۔ حکومت ملک انا کولاآن چلینگوک آ پاور پلانٹ آتے پدریسہ تھرانا کولا غا گدریفنگ آ سجفنگ اٹی ءِ ہرانا مسخت کبین درآمدی کولاآسیبو ءِ چٹفنگ ءِ۔ داسال فروری ٹی وزیراعظم کراچی نیو کلیئر پاور پلانٹ نا مسٹ میکو یونٹ کے۔ تھری نا ہم بناءِ کرے ہرا 1،100 میگاواٹ بجلی ودی کیک۔ چاہندار آتا پاننگ ءِ کہ پاکستان اٹی 60،000 میگاواٹ نا غیر استعمال شدہ پن بجلی نا لائخی ساڑی ءِ۔ پن بجلی نا پیدوار نا کنڈا پیش گامی کرسا دسمبر 2022 اٹی وزیراعظم منگلا پاور اسٹیشن نا اِرا تجدید شدہ یونٹ آتا بناءِ کرے۔ دا یونٹ آتے امریکی ادارہ جہانی شونداری (یو ایس ایڈ) نا مالی کمک اٹ اپ گریڈ کننگا ہراڑان ٹرانسمیشن سسٹم اٹی 70 میگاواٹ بجلی نا ودکی مسنے۔ دوئی حساب وکتاب نا رداٹ پاکستان نا توانائی نا سالانہ درآمدی بل 27 بلین ڈالر ءِ و گڑتی کرنٹ اکاؤنٹ نسخان نا مون ءِ توننگ کن اودے دمدستی وڑاٹ شمسی ، تہو، ہائیڈل و نیوکلیئر تون اوار توانائی نا گیگ بدل ہندی ذریعہ غاتے شون تننگ نا گرج ءِ۔ پاکستان نا توانائی نا بشخ داوخت آ تیل و گیس انا درآمد آتیا بھاز زیات سیبو کیک ہنداسوب آن وزیراعظم شہباز شریف نا حکومت دا سیبو ءِ کم کننگ و ساف توانائی نا ہندی ذریعہ غاتا کنڈا ہِننگ کن بھلو گام گیج کرینے۔ غٹ آن مست سعودی فنڈ شونداری(ایس ایف ڈی) اپریل اٹی پاکستان نامہمند ملٹی پرپز ڈیم پروجیکٹ نا کمکاری کن 240 ملین ڈالر نا وام معاہدہ غا دستخط کریسس۔ داتُو قومی اقتصادی کونسل نا ایگزیکٹیو کمیٹی (ایکنک) ہم 1.2 ٹریلین روپئی نا خڑچ انا دیامربھاشا ہائیڈرو پاور جنریشن پروجیکٹ نا منظوری ءِ تس۔ شہباز شریف حکومت مہالو آن چینی کمپنی تا کمک و زرکاری دوئی کرسا پاکستان اٹی دااِرا بھلا ہائیڈرو پروجیکٹ آتا تفنگ اٹ لگوک ءِ تانکہ کم خڑچ و پائیدار توانائی آن بجلی نا کاختی نا مون ءِ توننگ اٹ کمک ملنگ کے۔
