اسلام آباد۔ 21مئی (اے پی پی) وزیر خزانہ سینیٹر محمد اسحاق ڈار یک شنبے نا دے وزارت خزانہ ٹی بروک آ مالی سال 2017-18 ءنا بجٹ نا تیاری تا جاچ دیوان نا کماشی ئِ کرینے۔ سیکرٹری واپار بجٹ نا خدوخال ئِ مون آتخا و وزیر خزانہ ئِ چندی بجٹ سلاہ غاتیان معلومدار کرے۔ اوپارے کہ بجٹ سلاہ نا بابت آن غٹ شریدار آتون سرجمی اٹ اوڑدہی کننگانے۔ داوخت آ وزیر خزانہ پارے کہ سلاہ غاتا پیش نظر بجٹ ئِ تیار کننگے۔ اوپارے کہ حکومت ملکی برآمد آتیٹی ودکی آ چکار تخنگ ئِ تانکہ جی ڈی پی ٹی پائیدار و زیات آن زیات ودکی کننگ مرے۔ او اسہ سال اس مست برآمد آتیٹی ودکی کن 180 ارب روپئی نا پیکج ئِ مون آ تخا و پارے کہ داڑآن ساڑی آ تُو تیٹی برآمد آتیٹی خاطر خواہ ودکی مسنے۔ وزیر خزانہ مستی پارے کہ جاری مالی سال اٹی جی ڈی پی نا شرح نمو 5.28 درسد اسکان ودانے ہرا گدرینگوک آ دہ سال اٹی غٹ آن زیات ئِ وخت اس کہ بروک آ مالی سال اکن دانا ہدف 6 درسد مقرر کننگانے۔ وزیر خزانہ بروک آبجٹ نا بابت خراج سلاہ غاتا ہم جاچ ئِ ہلک۔ اوپارے کہ حکومت بجٹ نا تیاری تیٹی لس بندغ نا شونداری و شونہالی آ چکار تخانے۔ اوتعلقدار وزارت، ڈویژن آتے پارت کرینے کہ بجٹ تیاری نا کاریم ئِ زوت آن زوت پورو کننگے۔ دیوان اٹی سیکرٹری خزانہ، اقتصادی و ڈویژن، واپار، چیئرمین ایف بی آر و وزارت خزانہ، ایف بی آر و اسٹیٹ بینک انا ایلو بڑزکو کمامدارآک ہم شرکت کرینو۔
