اسلام آباد۔ 21مئی (اے پی پی) بنجائی وزیر امور کشمیر و گلگت بلتستان چوہدری محمد برجیس طاہر پارینے کہ قومی سلامتی و معاشی شونداری حکومت نا اولیت ئِ ہراڑآ ہچ وڑنا سمجھوتہ نا سوج ہی ودی مفک، تاریخ ثابت کرینے کہ محمد نواز شریف ہمیشہ قومی سلامتی و قومی یکجہتی ئِ مون آ تخسا پاکستان نا مفاد اٹی فیصلہ کرے۔ یک شنبے نا دے داڑے جاری بیان اٹی بنجائی وزیر پارے کہ 1998ءٹی ہراتم بھارت ایٹمی دھماکہ غاتیان پد اسہ پلو پاکستان ئِ دھڑکو تسکہ و ایلو کنڈ جہانی دنیا پاکستان ئِ ایٹمی دھماکہ غاتیان اسہ پلو کننگ کن چندی وڑنا سفارتی و معاشی پابندی تا ہیت آتے کریکہ تو ہموحالیت آتیٹی ہم محمد نواز شریف ملک انا سلامتی ئِ اولین ہرسا پاکستان نا دفاع ئِ ناقابل تسخیر جوڑ کننگ نا فیصلہ کرے۔ بنجائی وزیر پارے کہ کلبھوشن یادیو نا معاملہ ٹی فیصلہ پاکستان نا قومی سلامتی ئِ مون آ تخسا کننگانے و کودک پاکستانی تا دتر تون گوازی کروک آ کلبھوشن یادیو کون آ جاسوس ئِ ہچ ئُ دروشم اسے ٹی بشخنگپک۔ اوپارے کہ حکومت ملک آن ہروڑنا انتشار و دہشت گردی نا چٹفنگ کن پرعزم ئِ و آپریشن ضرب عضب و آپریشن ردالفساد نا سوب ملک انا طول و عرض اٹی نئے بیرہ حکومت نا رٹ قائم کننگانے بلکن اینو فاٹا کون آ علاقہ غاتیٹی ماڈل ویلیجز و شاہراہ تا جوڑ جاڑ ترندی اٹ جاری ئِ۔ اینو فاٹا و بلوچستان نا الس پاکستان نا شونداری و شونہالی نا سفر اٹی تینا پبی کڑد ئِ ادا کننگ ئُ۔ چوہدری برجیس طاہر پارے کہ جہانی بینک اتون اوار دنیا نا مستند مالیاتی ادارہ غاک پاکستان اٹی مروک آ زبردست شونداری نا اعتراف ئِ کننگ ئُ۔ ورلڈ بینک نا رپورٹ نا رداٹ ساڑی آ مالیاتی سال 2016-17 ٹی پاکستان اٹی شونداری نا شرح گدرینگوک آ نہہ سال اٹی غٹ آن زیات مسنے۔ 2018 ءپاکستان کن شونداری و شونہالی نا اعتبار اٹ پین شونہال جوڑ مریک۔ اوپارے کہ دسمبر 2017 ءاسکان ملک آن لوڈشیڈنگ نا پورو چٹفنگ آن تہاری تا پوروی اٹ خاتمہ مریک و مسلم لیگ ن تینا پنچ سالہ دور اقتدار نا پوروی اتون پاکستان نا الس ئِ اسہ معاشی وڑاسے آ سوگو و خودکفیل پاکستان نا حوالہ کیک۔
