اسلام آباد۔ 25 اپریل (اے پی پی) وزیرخارجہ بلاول بھٹو زرداری پارینے کہ پیشن نا ملک رہینگوک آ پاکستانی تا سلامتی کن حکومت پاکستان نا عزم ءِ مون آ تخسا وزارت خارجہ سوڈان اٹی پاکستانی تا ریلیف و ریسکیو ٹی لگوک ءِ۔ سے شنبے نادے آ دفترخارجہ نا ترجمان نا کنڈآن جاری بیان نا رداٹ وزیرخارجہ پارے کہ اینو خرطوم آن 211 پاکستانی تے ہرفسا اسہ پین قافلہ اس پورٹ سوڈان آ رسینگانے۔ تازہ انگا قافلہ تون حفاظت اٹ کشوک آ پاکستانی تا کل کچ 700 اسکان سرمسنے۔ اوپارے کہ خرطوم و پورٹ سوڈان اٹی سفیر میر بہروز ریگی نا ٹیم سوڈان اٹی ساڑی پاکستانی تا اڈکننگ نا آسراتی کن دے و نن کاریم کننگ اٹی ءِ۔ اوپارے کہ پاکستانی تا کشنگ نا عمل ءِ آسان کننگ کن ڈیہہ نا سنگت ملک آک خاص وڑاٹ مملکت سعودی عرب تون لگوک اُن۔ وزیرخارجہ پارے کہ ای ڈیہہ ٹی ننا مشن تا خواری و سیکرٹری خارجہ ڈاکٹر اسد مجید خان نا کماشی ٹی دفترخارجہ نا مچ آ ٹیم انا منت واراُٹ ہرا بین ایجنسی کوآرڈی نیشن نا عمل نا کماشی ءِ کننگ اٹی ءُ۔
