بلاول بھٹو پنجاب نا ضمنی گچین کاری تیٹی پارٹی ٹکٹ آتا بشخنگ نا باندات آتیا شش باسکی جاچ کمیٹی اس جوڑ کرے، نوٹیفکیشن جاری

لاہور۔ 23 اپریل (اے پی پی) پیپلزپارٹی نا چیئرمین بلاول بھٹو زرداری پنجاب نا ضمنی گچین کاری تیٹی پارٹی ٹکٹ آتا بشخنگ نا باندات آتیا شش باسکی ریویو کمیٹی اس جوڑ کرینے ہراٹی سید یوسف رضاگیلانی ، سید نیئر حسین بخاری، مخدوم احمد محمود، قمر زمان کائرہ، رانا فاروق سعید و سید حسن مرتضیٰ ئسک اوار ءُ۔ چیئرمین بلاول بھٹو زرداری نا پولیٹکل سیکرٹری جمیل سومرو دا چرجوئی ٹی باقاعدہ نوٹیفکیشن اس جاری کرینے۔ داکان بیدس قائم مقام صدر پیپلزپارٹی نیامی پنجاب رانا فاروق سعید پارینے کہ پنجاب اٹی پارٹی ٹکٹ آتا بشخنگ آ گڑتی کروک آ چیئرمین بلاول بھٹو زرداری آن اپیل کننگ کیرہ، ہرا اومیتدار آتے ٹکٹ ملتنے او تینا اپیل آتے جاچ کمیٹی نا باسک آتے ہم گدریفنگ کیرہ۔ رانا فاروق سعید پارے کہ چیئرمین بلاول بھٹو زرداری ٹکٹ آتا بشخنگ اٹ شفافیت کن 6 باسکی جاچ کمیٹی اس جوڑ کرینے۔ اپیل آتے زرداری ہاؤس اسلام آباد ءِ 25 اپریل اسکان گدریفنگ مریک۔ اومستی پارے کہ گڑتی تخوک آ اومیتدار کمیٹی باسک آتے ہم 25 اپریل اسکان وٹس ایپ کننگ کیرہ۔ پیپلزپارٹی و اونا سرکڑدہ غاک کارندہ غاتیا فیصلہ ءِ زوراکی اٹ آخا بلکن اواری اٹ کیرہ۔