اسلام آباد۔ 22اپریل (اے پی پی) صدر مملکت ڈاکٹر عارف علوی چنکا عئید انا خوشی نا وخت آ مچ آ پاکستانی قوم و غٹ عالم اسلام ءِ مبارکبادی پیش کرسا پارینے کہ اللہ تعالیٰ آن دعا ءِ کہ او چنکا عئید انا دا بابرکت وخت آروچہ مبارک نا ننا روچہ و عبادت آتے قبول کے۔ اللہ تعالیٰ ملک پاکستان ءِ شونداری، شونہالی، امن و سوگوی عطاکے۔ پاکستانی قوم ءِ امن، عافیت و فراوانی عطا کرسا اوفتا ڈکھیائی و تکلیف آتا مداوا ءِ کے۔ اللہ تعالیٰ مچ آ عالم اسلام ءِ اقوام عالم نا مون آ سرسہب کے۔ چنکا عئید انا وخت آ تینا کلہو اٹی صدر مملکت ڈاکٹر عارف علوی پارے کہ ای اللہ تعالیٰ نا حضور دعا کیوہ کہ دا عئید ننکن امن وسلامتی و خوشی تا دے اس اتے و ملک ءِ پاکستان ءِ شونداری ، شونہالی و سوگوی عطاکے۔ روچہ مبارک ننے ٹی ہرا ڑے تقویٰ و پرہیزگاری ودکی کیک ہموڑے ایلوفتا تکلیف، بین، و فریشانی تا احساس ہم ودی کیک۔ دا احساس ہرراج آن نیزگاری و ناانصافی تا چٹفنگ نا بنداوجوڑ مننگ کیک۔
