تہران۔ 12مئی (اے پی پی) ایران نا صدر حسن روحانی نا پاننگ ئِ کہ گچین کاری تیٹی اونا دُوارہ سرسہبی دا ہیت ئِ صفا کرینے کہ ایرانی الس شدت پسندی نا مخالف و پیشن نا دنیا تون زیات رابطہ خوائک۔ یک شنبے نا دے ذرائع ابلاغ نارپورٹ نارداٹ تدوک آ دے 57درسد وونٹ ہلسا دُوارہ صدارتی گچین کاری تیٹی سرسہبی دوئی کروک آ ایرانی صدر روحانی نا پاننگ ئس کہ اوناحریف ئِ دا حق ارے کہ او اوڑآ تنقید کے و او داحق انا قدر ئِ کیک۔ 68 سالہ صدر حسن روحانی قدرے اعتدال پسندئُ عالم اسے ہرا2015ءٹی جہانی راہشون آتون جوہری قول و اقرارآ ہیت وگپ کریسس و اہم قول و قرار طے مس ولے دا معاہدہ نا بھرم آک داسکان الس اسکان سرمننگ کتنو۔ چاہندار آتا پاننگ ئِ کہ صدر روحانی نا داخہ در بھلا سرسہبی نا مطلب ئِ کہ داسہ اوڑتون اصلاحات کننگ و ملک انا بگڑینگوک آ معیشت اٹی دُوارہ جان اس شاغنگ کن مینڈیٹ مریک۔ صدر روحانی نا پاننگ ئس کہ ایران دنیا تون رابطہ نا کسر ئِ پَٹانے ، ہندن ئُ کسر اس ہرا بیدادی و شدت پسندی آن بھازمر ئِ۔ اوپارے کہ گچین کاریک داسہ چٹانو، داسہ ای قوم انا صدر اُٹ و کنے ہر ایرانی نا کمک درکارئِ بشمول اوفتا ہرا کنا پالیسی تیان اختلاف کیرہ۔
