اقوام متحدہ ۔ 18 اپریل (اے پی پی) اقوام متحدہ ٹی پاکستان نا آخبتی مندوب منیر اکرم پارینے کہ چاگڑدی بدلی پاکستان نا کشاری بشخ ءِ بھسکار وڑاٹ زہمی کننگ ءِ، ہراڑان خور اٹی خودکفیل ملک اٹی غذائی کاختی ودی مننگ ءِ۔ پاکستانی مندوب اقوام متحدہ نا ادارہ فوڈ اینڈ ایگریکلچر آرگنائزیشن (ایف اے او) نا کنڈآن شونداری کن غذائی بحران تیان بچنگ و خور انا نظام نا بدلی ءِ مون آ دننگ کن مالی کمکاری نا فراوانی نا وڑوڈول آتیا اڈ ہلوک اسہ شرہ سے ٹی گپ وتران کرسا پارے کہ چاگڑدی بدلی نا بھسکار اثرآتا سوب آن نن تدوک آ 3 سال اٹی کثیر جہتی بحران تتون مون تننگ اُن۔ اوپاکستان نا کیس ءِ پیش کرسا پارے کہ پاکستان اسہ وخت اسے ٹی غذائی رداٹ خودکفیل ئسک، پاکستان نا افرادی قوت نا 38 درسد کشت وکشار نا بشخ اتون وابستہ ئسر و 2021-22اٹی پاکستان نا جی ڈی پی ٹی کشاری بشخ انا بشخ 22.7درسد ئسر۔ چاگڑدی بدلی نا سوب آن ننا پیدواری لائخی ٹی پدریسہ کمتی بننگ ءِ۔ پاکستانی مندوب دا ہیت انا پیدواری ءِ کرسا پارے کہ پاکستان ءِ تدوک آسال بدترین چاگڑدی بحران تیان اسٹ اسے تون مون تروئی تما موسم بہار اٹی باسنی نا ریسہ فصل آتا پیدوار ءِ زہمی کرے۔ اوکان پد تیرمہ ٹی بدترین نوکاپ نا سوب آن فصل آک بھس مسر۔ اوپارے کہ نوکاپ نا سوب آن 4.4ملین ایکڑ رقبہ غا سلوک فصل آک ڈبنگارو نوکاپی دیر سلنگ نا سوب آن بروک آ سیزن کن وخت آ فصل دسپننگ آن خور اٹی خودکفیل ملک اٹی غذائی کاختی ودی مس۔ داخہ بھلو کچ اسے آ چاگڑدی بدلی نا اثرآتیان پد ہم جہانی کہول آ امداد کن پاکستان نا اہلیت ءِ امنا کننگتو۔ حیرت انگیز وڑاٹ ننے پی آرجی ٹی یا فوڈ شاک ونڈو اسٹ اسےنا ہم آب انا اہل گوندنگتو۔ آئی ایم ایف تون ننامذاکرات کیہی تُو انا طوالت نا گواچی ءِ۔ پاکستانی مندوب اقوام متحدہ  نا سیکرٹری جنرل نا داہیت آن ہم امنا کرے کہ جہانی مالیاتی نظام اخلاقی وڑاٹ خواتہ ءِ۔ مخلوق بے پکی و بے گمانی شاک آتیان دوچار ءِ اوکان پد ہم او کمک اسکان رسینگ دوئی کپننگ ءِ۔ اوداحقیقت ءِ تالان کرسا پارے کہ نن جہانی مالیاتی نظام اٹی ساڑی خامی تے مر کننگ نا بایدے کوشست کین۔