اسلام آباد ۔ 24 مارچ (اے پی پی)آذربائیجان نا دارالحکومت باکو ٹی پاکستان نا سفارت خانہ ٹی یوم پاکستان نا بابت اسہ دود اس اڈتننگا ۔ باکو ٹی اڈ ہلوک آ دود اٹی پاکستان نا قومی بیرک ءِ ہم چست کننگا، دود اٹی سفارتی عملہ و ایلو اہم شخصیت آک بشخ ہلکر۔ دودآن تران کرسا آذربائیجان اٹی پاکستان نا سفیر بلال حئی یوم پاکستان نا اہمیت ناذکر ءِ کرسا پارے کہ دادے غٹ پاکستانی تیکن بھاز اہمیت تخک، 23 مارچ 1940 آ برصغیر نا مسلمانک لاہور اٹی اسہ قرارداد اس پاس کرسا برصغیر نا مسلمان تیکن اسہ ہندن ءُ ریاست اس جوڑ کننگ نا فیصلہ کریر ہراڑے او تینا قدر و روایت آتا رداٹ زند ءِ تیر کننگ کیر۔ 1940 اٹی برصغیر نا مسلمانک تحریک پاکستان کن پبی جہد نا بناءِ کریر و بیرہ ہفت سال انا وخت اٹی پاکستان اسہ حقیقت اس جوڑ مس و دنیا نا نقشہ غا اسہ وتواجہ ریاست نا وڑاٹ مون آ بس۔ اوپارے کہ دادے داسوب آن ہم بھاز اہم ءِ کہ دا دے برصغیر نا مسلمانک اسہ قوم اسے ٹی بدل مسر و پک کریر کہ دا قوم اسہ جتا ءُ وطن اسے نا حقدار ءُ ہراڑے او تینا قدر ، روایت و اولیت آتا رداٹ زندء ِ تیر کننگ کیر۔ پاکستانی سفیر پاکستان و آذربائیجان نا نیام اٹ بڑزکو کہول انا سنگتی و ایلمی تعلقداری نا ہم ستاءِ کرے۔ اوپارے کہ پاکستان غٹ جہانی و علاقائی پلیٹ فارم  تیا پدریسہ مخ تفی آ ایلم ملک آذربائیجان نا منت وار ءِ ۔ سفیر بلال حئی پارے کہ پاکستان و آذربائیجان تین پہ تینی است خواہی نا غٹ امور تیا اسہ ایلو نا مخ تفی ءِ کننگ کن کوپہ تون کوپہ ملفسا سلوک ءُ۔