کوئٹہ۔ 09 مارچ (اے پی پی)پیپلزپارٹی وویمن ونگ بلوچستان نا راہشونک پارینو کہ سیاست اٹی زالبول آتا کچ اخس زیات مریک ہموخس ہی زالبول آتا برخلاف ہراسیت و صنفی بریبری نا بنداوی شڑت انا پوروی آ توار بڑز مرسا کیک، سیاست تون اوار اوار زند انا ایلو بشخ آتیٹی ہم زالبول آک گچین لائخی تا درشانی ءِ کرسا ملکءِ قومی ہیرو فراوان کرینو، پاکستان پیپلزپارٹی نا زالبول ونگ مچ آ ملک اٹی زالبول آتے تینا روا ہند اس ترفنگ کن اسہ قربانی سے آن ہم دریغ کپک۔ داہیت ءِ پیپلز پارٹی وومن ونگ بلوچستان نا صوبائی صدر غزالہ گولہ ویڈیو لنک انا کمک اٹ و صوبائی نائب صدر پروین مینگل، نائب صدر ماہ جبین خالد جمالی، صوبائی ڈپٹی جنرل سیکرٹریز عابدہ بلوچ، ثناء درانی، عیدیہ ملک ، زمرد خواجہ خیل ئسک اڈ ہلوک آ زالبول آتاجہانی دے انا وخت آ دود آن تران کرسا پاریر۔ اوفک پاریر کہ زالبول آک ننا راج و سیاست اٹی اہم ءُ کڑد اس داکرسا بننگ اٹی ءُ، سیاست اٹی زالبول آتا کچ اخس زیات مریک ہموخس ہی زالبول آتا برخلاف ہراسیت و صنفی بریبری نا بنداوی شڑت انا پوروی آ توار بڑز مرسا کیک۔ فیصلہ سازی ٹی ہندن ہندن زالبول آتا نمائندگی ودسا ہِننگ ءِ ، ہمووڑ زالبول آتیا سیاسی زمواری تیٹی ہم ودکی مرسا کیک۔ دنیا نا کیہی ملک آتا سرکڑدہ ئی داوخت آزالبول آتا دوٹی ءِ۔ داڑان پک مریک کہ شون ہلوک ملک آک مریر یو پدتموک ملک آک، زالبول آک ہرجاگہ غا سرسہبی نا بیرک خلنگ اٹی ءُ۔ اوفک پاریر کہ پاکستان اٹی دے پہ دے داہیت انا درک ودنگ ءِ کہ اینو نا دا پوسکن آ دور اٹی ہم زالبول آتے سیاست و السی زند آن مُر تخنگ انگ ءِ۔ ولے زالبول آک ہم سیاسی مزاہمت و جہد نا کمک اٹ اہم کڑد ادا کننگ اٹی ءُ۔ ہندا بناآ ساڑی آ سال تیٹی سیاست و ایلو زند انا بشخ آتون گڑاس بڑزکو حکومتی عہدہ غاتیا زالبول خننگانے۔ دا چرجوئی ننا شہید قائد بے نظیر بھٹوتون بناکرے ہرانئے بیرہ پاکستان بلکن مچ آ مسلم دنیا نا اولیکو زالبول وزیراعظم جوڑ مس۔ ملک انا شونداری، شونہالی و ڈیہہ ٹی امن کن اونا شاندار کوشست آتا اعتراف نئے بیرہ ملک انا تہہ ٹی بلکن مچ آ دنیا ٹی کننگک۔ اوپارے کہ شہید بے نظیر بھٹو نا کنڈآن سیاسی اصلاحات نا کمک اٹ زالبول آتے وتواجہ جوڑ کننگ، پارلیمنٹ اٹی زالبول آتا نمائندگی ءِ ودفنگ و ہر زند انا بشخ اٹی زالبول آتے روا ہند اس ترفنگ کن سیاسی جہد نا کمک اٹ بھلو خذمت اس سرتسوسس۔ اوپارے کہ سیاست تون اوار اوار زند انا ایلو بشخ آتیٹی ہم زالبول آک گچین لائخی تا درشانی ءِ کرسا ملک ءِ قومی ہیرو تسنو۔ ہرافک مچ آ دنیا ٹی ملک انا پن ءِ روشنا کرینو۔ اومچ آ دنیا نا زالبول آتون یکجہتی نا درشانی ءِ کرسا پاریر کہ نن پاکستان پیپلزپارٹی نا پلیٹ فارم آن ملک اٹی زالبول آتا بنداوی حق انا رکھ و بریبری آتالان راج اسے نا ٹہیفنگ کن تینا سیاسی جہد ءِ برجاتخانن۔ و پاکستان پیپلزپارٹی نا زالبول ونگ مچ آ ملک اٹی زالبول آتے تینا روا ہند اس ترفنگ کن اسہ قربانی سے آن ہم دریغ کپک۔ ودود اٹی پاکستان پیپلزپارٹی زالبول ونگ انا صوبائی نائب صدر ماہ جبین خالد جمالی، صوبائی ڈپٹی جنرل سیکرٹری عابدہ بلوچ، ڈپٹی جنرل سیکرٹری ثنادرانی، ڈپٹی انفارمیشن سیکرٹری بینظیر گولہ، صوبائی میڈیا کوآرڈی نیٹر فائزہ پوپلزئی ، کوئٹہ ڈویژن نا صدر خدیجہ زہری، جنرل سیکرٹری عیدیہ ملک سیکرٹری حوالکاری زمرد خواجہ خیل، ڈسٹرکٹ کوئٹہ نا صدر بلقیس اعوان، جنرل سیکرٹری مریم راجپوت ، ڈپٹی جنرل سیکرٹری صنم عسی، کوئٹہ سٹی نا نائب صدر روزینہ و ایلوزالبول آک بشخ ہلکر۔
