اسلام آباد۔ 09 مارچ (اے پی پی) بنجائی وزیر واپار سید نوید قمر پاکستان و متحدہ عرب امارات نا نیام اٹ ہڑتوم آ کنڈآتا واپاری قدر ءِ ودفنگ نا گرج آ زور شاغسا پارینے کہ ہڑتوم آ ملک آتا نیام اٹ قابل تجدید توانائی، کشاری، ساہدار، ٹیکسٹائل ، سُو، پیٹرولیم و مہمان داری نا بشخ آتیٹی کمکاری نا گیشتر گمان ساڑی ءِ۔ داخیال آتا درشانی ءِ او پنچ شنبے نادے آ پاکستان اٹی متحدہ عرب امارات نا سفیر حما دعبید ابراہیم سالم الزابی تون اوڑدہی ٹی پارے۔ اوپارے کہ پاکستان ومتحدہ عرب امارات نا نیام اٹ ہڑتوم آ کنڈآتا واپاری قدر ءِ قدفنگ نا سخت گرج ءِ ، ہڑتوم آ ملک آتا نیام اٹ قابل تجدید توانائی، کشاری، ساہدار، ٹیکسٹائل ، سُو ، پیٹرولیم و مہمانداری نا بشخ آتیٹی کمکاری نا گیشتر گمان ساڑی ءِ۔ اوپارے کہ مالی سال 2022 اٹی ہڑتوم آ ملک آتا نیام اٹ کل واپار نا کچ 10033.05ملین ڈالر ئسک ہراٹی متحدہ عرب امارات ءِ برآمدآک 1369.83 ملین ڈالر ودرآمد آک 8663.22 ملین ڈالر ئسر۔ متحدہ عرب امارات نا سفیر بنجائی وزیر نا نقطہ نظر آن امنا کرسا پارے کہ پاکستان و متحدہ عرب امارات نا نیام اٹ مذہبی، پائیدار، تاریخی و کمکاری آ تالان تعلقداری ءِ ہرافتے ہڑتوم آکنڈآتا واپار اٹی ودکی نا کمک اٹ پین گچین کننگ نا گرج ءِ۔
