لاہور۔ 09مارچ (اے پی پی) وزیراعظم نا خصوصی کمکار امور نوجوانان شیزا فاطمہ خواجہ پارینے کہ ورناتا آخبت ءِ رکھ کننگ حکومت نا اولیت آتیٹی اوار ءِ، ننا ورناک لائخ و سنبرینگوک ءُ اوفتے مون آ ہِننگ کن جوان پلیٹ فارم اسے نا گرج ءِ۔ داخیال آتا درشانی ءِ او پنچ شنبے نادے آ نیشنل کالج آف آرٹس (این سی اے) ٹی شجرکاری مہم نااہمیت نا سرحال آ پوسٹر نا نمائش نا بناءِ کننگ نا وخت آ کرے۔ شیزا فاطمہ پارے کہ ورناتیکن 2013ٹی ہمووخت انا وزیراعظم محمد نواز شریف خصوصی پروگرام نا بناءِ کریسس ہرانا بنداوی مسخت ورناتے گچین پلیٹ فارم اس فراوان کننگ ئسک و2023اٹی دا پروگرام نا 10 سال پورو مسنو، مسلم لیگ (ن) نا حکومت ورناتا بابت مہالوآن زیات سنبرینگوک ءِ و ہندا مسخت کن وزیراعظم محمد شہباز شریف یوتھ پروگرام نا بناءِ کرینے۔ اوپارے کہ او بطور وزیراعظم نا سلاہکار امور نوجوانان داہیت آ ہم خاص چکار کننگ ءِ کہ تعلیمی ادارہ غاتیٹی ورناچین ءِ مون تروک چیلنج آتیان معلومدار کننگے و دا چیلنج آتون مون تننگ کن اوفتا سلاہ تے دوئی کننگے تانکہ ملک ءِ شونداری نا کنڈا دننگ مرے۔ شیزافاطمہ پارے کہ اودے این سی اے ٹی طالب علم آتا کنڈآن موسمیاتی و چاگڑدی بدلی و شجرکاری نا سرحال آ جوڑ کروک آپوسٹر آتے خنسا خوشی مننگ ءِ کہ ننا ورناچین ءِ دا ویل آتا جوانی اٹ سماءِ۔ اوپارے کہ این سی اے ملک انا گچین ادارہ ءِ داکان تعلیم دوئی کروک آک مچ آ دنیا ٹی پاکستان نا پن ءِ روشنا کریر و او چندی بشخ آتیٹی پنی آ آرٹسٹ جوڑ مسر۔ اوپارے کہ ننا ملک اٹی ٹیلنٹ نا کمتی اف ، ننا ورناتے جوان پلیٹ فارم اسے نا گرج ءِ تانکہ اوتینا لائخی تے منفنگ کیر۔ داوخت آ او این سی اے ٹی نیال اس خلسا شجرکاری مہم نا بناءِ ہم کرے۔ داکان مست این سی اے نا وائس چانسلر پروفیسر ڈاکٹر مرتضیٰ جعفری اودے تینا ادارہ نا بابت حوال تس۔
