اسلام آباد۔ 09 مارچ (اے پی پی) بنجائی وزیر خزانہ و محصولات سینیٹر محمد اسحاق ڈار پارینے کہ منہ دے اٹی آئی ایم ایف تون معاہدہ مریک، تدوک آ حکومت شونداری ادارہ غاتاپت ءِ نسخان تس، پوسکن آ بجٹ اٹی زرگزران ءِ سوگوی تننگ نا خواہندار اُن، پوسکن آ بجٹ اٹی الس ءِ ریلیف تننگ کن گام گیج کینہ، زوت زرگزرانی ویل آتا مون ءِ تورنہ۔ داخیال آتا درشانی ءِ او پنچ شنبے نادے آ پبلک فنانشل مینجمنٹ نا کمک اٹ زرگزرانی سوگوی نا بحالی نا سرحال آ اڈ ہلوک آ سیمینار آن تران کرسا کرے۔ وزیرخزانہ اسحاق ڈار پارے کہ شونداری شریدار جہانی بینک و ایشیائی شونداری بینک انا منت وار اُٹ۔ اوپارے کہ ملکی زرگزران نا گچینی کن گام گیج و اودے دُوارہ ٹریک آ اتنگ نا کوشست کننگ اُن، ننے زرگزرانی مشکل آتون اوار چندی چیلنج مون تروک ءِ، زرگزرانی تنکی ننے میرات اٹی ملا، زرگزران نا بابت مس مینجمنٹ مون تروک ءِ، تدوک آ حکومت نا زرگزرانی پالیسیک جوان انگا زرگزران ءِ خراب کریر، پاکستان 2018 ٹی دنیا نا مون آ بروک آ زرگزران تیٹی اوار ئسک، ولے ولدا 2018 ٹی ہی زرگزرانی حالیت آتیٹی مشکل بننگ بناکریسس، جہانی مارکیٹ اٹی پاکستانی مصنوعات آتا رسینگ اسہ چیلنج اسے۔ بنجائی وزیر پارے کہ پوسکن آ بجٹ اٹی زرگزران ءِ سوگوی تننگ نا خواہندار اُن، پوسکن آ بجٹ اٹی الس ءِ ریلیف تننگ کن گام گیج کینہ، زوت زرگزرانی ویل آتا مون ءِ تورنہ، پاکستان نا شونداری ٹی جہانی بینک انا کنڈآن کمکاری ستاکڑزک، و بروک آ دے تیٹی آئی ایم ایف تون معاہدہ نا اومیت ءِ۔ اسحاق ڈار پارے کہ مستین اٹ غلط پالیسی تا سوب آن بجٹ نسخان تون مون تروئی مس، عمران خان پاکستان نا وام تیٹی ودکی کرے و آئی ایم ایف نا پروگرام آن انحراف کرے و شونداری ادارہ غاتا پت ءِ نسخان تس، نن بننگ تون مسکوہی حکومت نا طے کروک شڑت آتیا عملدرآمد کرین، اومیت ءِ کہ آئی ایم ایف تون معاہدہ منہ دے اٹی طے مریک۔ وزیرخزانہ پارے کہ ن لیگ تدوک آ دور اٹی آئی ایم ایف پروگرام ءِ پورو کرے، ننا دور اٹی فی کس کٹیا 379 ڈالر ودکی مس، ولے پی ٹی آئی نا حکومت اٹی چار سال اٹی بیرہ 30 ڈالر نا ودکی مس، سیوتی حکومت ءِ بھسکار زرگزران میرات اٹی ملا، مسکوہی حکومت نا سوب آن جہانی ادارہ و پاکستان نا نیام اٹ پت انا کمتی ودی مس نن تدوک آ حکومت نا جہانی ادارہ غاتون قول ءِ پورو کینہ۔ آئی ایم ایف تون قول آتے پورو کینہ، آئی ایم ایف تون منہ دے اٹی معاہدہ مریک ۔ اوپارے کہ داوخت آ ملک ءِ مشکل مون تروک ءِ ، غٹ تینا بشخ ءِ شاغر وزیراعظم کفایت شعاری مہم نا پڑو کرینے ہرانا رداٹ بے گرج خڑچ آتے کنٹرول کننگ کن گام گیج کننگانے۔ اوپارے کہ نوکاپ آن زہمی علاقہ غاتا بحالی کن 16 ارب ڈالر درکار ءِ، زرگزرانی مشکل آتے چٹفنگ کن غٹ ءِ تینا بشخ ءِ شاغوئی مریک، کابینہ باسک آک بھلا جیپ انا کاریم اٹ اتنگ ءِ چٹفیر، بنجائی حکومت تینا خڑچ آتیٹی 15 درسد کمتی کیک۔ اوپارے کہ زرگزران نا بارواٹی پروپیگنڈا مہم اس چلیفنگ انگ ءِ ، ہرا ملک اکن نسخانی اسے ملک ءِ چارٹرآف اکانومی نا گرج ءِ، سرکاری فنڈ آتا خڑچ اٹی نظم و ضبط اتنگ غٹ سرکاری کمامدارآتا زمواری ءِ۔ وزیرخزانہ پارے کہ راجی و اقتصادی شونداری و اصلاحات اٹی شونداری شریداری نا کمک قابل قدر ءِ، ادارہ غاتیٹی اصلاحات نا عمل برجاءِ۔ اوپارے کہ سیوتی تا کمک اٹ زرگزران ءِ بحال کننگ نا کوشست کننگ اُن۔ اوپارے کہ 2013ٹی ہم پاکستان ڈیفالٹ نا دنگ آ ئسک نن زمواری ہلکن و آئی ایم ایف پروگرام آ ہنان و زرگزران ءِ شونداری نا کسر آ شاغان داوار ہم ملک ءِ مشکل آتیان کشنہ و شونداری نا کسر آ اتینہ۔ وزیرخزانہ پارے کہ کبینی نا پریشر ءِ تورنہ، کشاری پیدوار اٹی ودکی کن گام گیج کرینن، فی ایکڑ پیدوار اٹی ودکی آ چکار کننگا، توانائی نا بشخ اٹی اصلاحات کننگ انگ ءِ اصلاحات ناعمل آسان اف ولے ولدا ہم کوشست کرینن بجلی و گیس انا بشخ اٹی اصلاحات کرینن۔ اوپارے کہ جی ڈی پی نا کچ آن وام تا کچ 69 درسد ءِ، ہراتم ای وزیرخزانہ جوڑ مسٹ تو دا 73 درسد ئسر، 2017ٹی وام تا کچ 63 درسد ئسک، امریکہ و یوکے ٹی وام تا کچ سد درسد آن ہم زیات ءِ۔ مشکل ضرور ارے ولے اوفتا مون ءِ تورنہ۔ وزیرخزانہ پارے کہ آئی ایم ایف ءِ است جم کرینن ، منہ دے اٹی آئی ایم ایف تون معاہدہ مریک۔
