اسلام آباد۔ 09 مارچ (اے پی پی) بیگم ثمینہ علوی زالبول آتیا زور شاغانے کہ او زرگزران نا آخبت نا وڑاٹ انفارمیشن ٹیکنالوجی نا اہمیت نا رداٹ دا بشخ اٹی تینکن وارخواہی پٹر، آئی ٹی ٹی مہارت پاکستان کن تینا زرگزران ءِ گچین کننگ و برآمد آتے ودفنگ نا کوشست آتیٹی کمکار جوڑ مننگ کیک۔ پنچ شنبے نادے آ داڑے پی اے ایف بیس نورخان اٹی فضائیہ بلقیس کالج آف ایجوکیشن زالبول آتا 30 می کانووکیشن نا دود آن تران کرسا اوپارے کہ ملک انا یونیورسٹی تے سائبر سیکورٹی، آرٹیفیشل انٹیلی جنس، کلاؤڈ کمپیوٹنگ و ڈیٹا اینالیٹکس آ چکار کننگ نا گرج ءِ انتئے کہ دنیا ءِ دا بشخ آتیٹی کسبکار بندغ آتا گرج ءِ۔ بیگم ثمینہ علوی پارے کہ زیات آن زیات کمپنی، کاروبار، حکومت و نجی ادارہ غاک تینا ہڑدے ئی معمول آتیٹی آئی ٹی ٹول آتے تینا کرینے و آخبت اٹ پین ہم زیات کمپنی ڈیجیٹل ذریعہ نا کنڈا کارہ۔ اوپارے کہ آئی ٹی ٹی مہارت پاکستان کن تینا زرگزران ءِ گچین کننگ و برآمد آتے ودفنگ کن جہد اٹی اسہ روشنا ءُ موقع اس پک مننگ کیک۔ اوپارے کہ آئی ٹی نا بشخ اٹی زرکاری کرسا، ورناو خاص وڑاٹ زالبول آتے تعلقدار چاہنداری تیان آراستہ کرسا، ملک تینا برآمد آتا کچ ءِ ودفنگ کیک و مالی ویل آتیان پیش تمنگ کیک۔ داوخت آ گریجویٹ آتے مبارکبادی ترسا اوپارے کہ تعلیم نا دوئی کننگ اٹ اوفتا سفر چٹتنے بلکن آزموندہ غاتون ہیل کننگ نا اسہ برجاءُ عمل اسے۔
