اسلام آباد۔9مارچ (اے پی پی):صدر مملکت ڈاکٹر عارف علوی ءَ گوں تنزانیہءَ پاکستان ءِ نامینتگیں ہائی کمشنر سراج احمد خان ءَ پنچ شمبے ءِ روچ ءَ گند ءُ نند کت۔ ایوان ءِ صدر ءِ پریس ونگ ءِ رد ءَ صدر مملکت ءَ دو نیمگی سیت آنی واستہ پاکستان ءُ تنزانیہ ءِ نیام ءَ تجارتی ءُ معاشی کمک آناں ودینگ ءِ ضلورت ءِ سر ءَ زور پر دیان ءَ گوشت کہ پاکستان تنزانیہ ءِ گوما یکوئی آناں ھاسیں ارزشت دنت۔ پاکستان تنزانیہءِ گوما معاشی ءُ دود ءُ ربیدگی یکوئی آنی ودینگ ءِ واھشت ائیگ انت۔ دو نیمگی یکوئی آناں گیش مھکم جوڑ کنگ ءِ واستہ مزن تکی سیاسی ءُ دود ءُ ربیدگی روگ ءُ آیگ آنی ضلور ت انت۔ صدر مملکت ءَ نامینتگیں ہائی کمشنر ءَ را تنزانیہ ءِ ادارگ آنی کار رپک ءِ تہءَ گیشی ءِ واستہ پاکستان ءِ نیمگ ءَ چہ کمک آناں ودینگ ءِ پنت ءُ شون کت۔ آئی ءَ گوشت کہ نامینتگیں ہائی کمشنر دوئیں ملک آنی نیام ءَ السی رابطہ ءُ تجارت ءَ را ودینگ ءِواستہ کار بکن اَنت۔ تنزانیہ ءِ نودربر پاکستان ءِ کم ھرچ ءُ درچی ورچوئل وانگ ءُ زانگی پروگرام آں چہ سیت چست کت کناں۔ پاکستان ءِ ورچوئل یونیورسٹی ءَ پیسر ءَ چہ کساس 8 ہزار گیر ملکی نودربر ورچوئل زانشت ھیل کنگ ءَ انت۔ صدر مملکت ءَ تنزانیہ ءِ گوما یکوئی آناں گیش گہتر کنگ ءِ واستہ کار کنگ پنت ءُ شون ھم دات۔
