نوکاپ آن زہمی علاقہ غاتا طالب علم آتیکن 500 اسکالرشپ تننگک، احسن اقبال

اسلام آباد۔ 07 مارچ (اے پی پی) بنجائی وزیر ڈٹ بندی ، شونداری، اصلاحات و خصوصی گام گیج احسن اقبال پارینے کہ پاکستان نا اِرا چارک آبادی ورناتیا تالان ءِ ، ورناتا داخہ بھلو کچ اسے تعلیم نا آسراتی فراوان کننگ بھاز المی ءِ، نوکاپ آن زہمی علاقہ غاتا طالب علم آتیکن 500 اسکالر شپ تننگک۔ داخیال آتا درشانی ءِ او سے شنبے نادے آ ایچ ای سی اسلام آباد اٹی زالبول آتا جہانی دے انا بابت اڈ ہلوک دود آن تران کرسا کرے۔ دود اٹی یو ایس ایڈ نا کمکاری اٹ ایچ ای سی نا کنڈآن نوکاپ زہمی علاقہ غاتا طالب علم آتیکن 500 اسکالر شپ نا پڑو کننگا۔ دود اٹی پاکستان اٹی امریکہ نا سفیر ڈونلڈ بلوم ہم بشخ ہلک۔ دود آن ترانکرسا بنجائی وزیر پارے کہ پاکستان اٹی ورناتا بھلو کچ اسے تعلیم نا آسراتی فراوان کننگ بھا ز المی ءِ۔ یو ایس ایڈ نا کنڈآن طالب علم آتیکن سکالر شپ نا پڑو ہنداوڑ ورناتے وارخواہی فراوان کننگ کن ءِ۔ ای 500 اسکالر شپ سپورٹ کننگ آ یو ایس ایڈ نا منت واری ءِ ہرفیوہ۔ اوپارے کہ نوکاپ زہمی علاقہ غاک بھس مسنو داجاگہ نا طالب علم آتیکن داوڑنا وارخواہی فراوان کننگ بھاز اہم ءِ۔ بنجائی وزیر پارے کہ عمران خان اینو کانود آن نرنگ ءِ۔ نن عدالت آتا نوٹس آتون مون تسن۔ سرجری آن پد ہم نیب نوٹس آ پیش مسن۔ کنے دزگیر کننگا۔ ننا لیڈر شپ ہم غٹ عدالت آتا سمن و پیشی تس۔ احسن اقبال پارے کہ عمران خان سمجھک کہ او عدالت و کانود آن بھلن ءِ۔ سپریم کورٹ عمران خان ءِ ڈھیل تسنے، او سپریم کورٹ  ءِ خاطر اٹ اتو۔ اوپارے کہ ہفت تُو اسکان او بلدیاتی ادارہ غاتا بحالی نا سپریم کورٹ نا آرڈر ءِ منتو۔ اوپارے کہ ہرابندغ ننے دیکی جمہوریت نا لیکچر تسکہ، ہرا بندغ ننے پاریکہ کہ عدلیہ نا شرف مریک، داسہ ہبو او امر کانود آن تینے ڈکھنگ ءِ، مخلوق ءِ نرزوری نا درس تروک آ عدالت نا سمن وصول کپننگ کن غسل خانہ ٹی تینے ڈکھک۔