چیئرمین سینیٹ نا پنی آ اداکار قوی خان نا کزیت آ است ہسونی نا درشان

اسلام آباد۔ 06 مارچ (اے پی پی) چیئرمین سینیٹ محمد صادق سنجرانی فلم ، ٹی وی و ریڈیو نا پنی آ اداکار قوی خان نا کزیت آ ڈکھیائی و است ہسونی نا درشانی ءِ کرینے۔ سینیٹ سیکرٹریٹ آن جاری بیان نا رداٹ چیئرمین سینیٹ پارے کہ قوی خان ٹی وی، فلم و ریڈیو ٹی تینا فن ءِ منفے۔ شوبز نا دنیا اسہ پنی ءُ اداکار اسے آن محروم مسنے۔ اوپارے کہ قوی خان نا کزیت آن ودی مروک آ خورکی اسُل پرمفک۔ قوی خان فلم، ٹی وی و اسٹیج نا پنی ءُ اداکار اس ئسک، شوبز نا دنیا ٹی اونا نمان خذمت آتے مدام یات تخنگک، اونا کزیت پاکستان نا فن انا بشخ انا بے بدل ءُ نسخان اسے۔ چیئرمین سینیٹ لیجنڈاداکار نا خذمت آتے خراج عقیدت پیش کرے۔ اوپارے کہ ڈکھیائی نا داساہت اٹی خاہوت آتون اوفتا غم اٹی بریبر نا شریک اُن۔ چیئرمین سینیٹ دعاکرے کہ اللہ تعالیٰ ایماندار نا بخشش و درجہ غاتے بڑز کے و غمزدہ خاہوت ءِ دا صدمہ ءِ حوصلہ وصبر اٹ سگنگ نا توفیق ایتے۔ داکان بیدس ڈپٹی چیئرمین سینیٹ مرزا محمد آفریدی، قائد ایوان سینیٹ سینیٹر اسحاق ڈار، قائد حزب اختلاف سینیٹر ڈاکٹر شہزاد وسیم ئسک ہم پنی آ ادارکار قوی خان نا کزیت آ ڈکھیائی و است ہسونی نا درشانی ءِ کرینو۔