اسلام آباد۔ 02 مارچ (اے پی پی) بنجائی وزیر انفارمیشن ٹیکنالوجی و ٹیلی کمیونیکیشن سید امین الحق نا کماشی ٹی ڈل گلوبل سسٹمز فار موبائل کمیونیکیشنز ایسوسی ایشن (جی ایس ایم اے) ایشیاء پیسفک نا سروک جولیئن گورمین و اونا ٹیم اتون بار سلونا موبائل ورلڈ کانگریس اٹی اہم ءُ اوڑدہی اس مس۔ اوڑدہی نا مسخت ہڑتوم آ کنڈآتا کمکاری نا مون آ دننگ و سال 2023کن ڈیجیٹل پالیسی تیٹی تین پہ تینی شریداری و حکمت عملی آ گپ وتران ئسک۔ اوڑدہی ٹی بنجائی وزیر سید امین الحق پارے کہ ملک اٹی ڈیجیٹل نیٹ ورک انا ودفنگ کن اسہ کنڈا پسماندہ و مرمرانگا علاقہ غاتیٹی براڈ بینڈ سروس آتا چندی ڈٹ پورو مننگ ءُ تو ایلو کنڈا ٹیلی کام آپریٹر آتا آپریشنل خڑچ آتیٹی نمان کمتی کن وزارت آئی ٹی نا اسپیکٹرم و انفراسٹرکچر شیئرنگ فریم ورک آخیریکو ریسہ غاتیٹی پترینگانو۔ جی ایس ایم اے ڈل ٹیلی کام سیکٹر کن وزارت آئی ٹی نا گام گیج و پالیسی تا ستاءِ کرسا آخبت اٹ تینا ہرممکن کمکاری نا باوری کرفے۔ اوڑدہی ٹی ممبر انٹرنیشنل کوآرڈنیشن اجمل اعوان، چیف ایگزیکٹیو یونیورسل سروس فنڈ حارث محمود چوہدری ، ڈائریکٹر جنرل وائر لیس جہانزیب رحیم، جی ایس ایم اے نا ہیڈ آف پبلک پالیسی جینٹ وائٹ، کنٹری ہیڈ سائرہ فیصل ساڑی ئسر۔ یات سلے کہ سید امین الحق دا ہڑتوم آ ورلڈ موبائل کانگریس اٹی بشخ ہلنگ کن بارسلونا ٹی ساڑی ءُ، 4 دے ئی کانفرنس اٹی بنجائی وزیر نا تینا ہم منصب جہانی راہشون و جہانی موبائل آپریٹرز و ٹیکنالوجی کمپنی تا سروک آتون اوڑدہی برجاءِ، جی ایس ایم اے ڈل اتون اوڑدہی ہندا چرجوئی نا کڑی اسے۔
