باکو۔ 02 مارچ (اے پی پی) آذربائیجان اٹی پاکستان نا سفیر بلال حئی اومیت ظاہر کرینے کہ پاکستان و آذربائیجان نا نیام اٹ سلاہ ئی اولیتی واپاری معاہدہ غا دستخط آن پد ہڑتوم آ ملک آتا واپار ءِ ساڑی 30 ملین ڈالر آن ودفنگ اٹ کمک رسینگک۔ داخیال آتا درشانی ءِ او پنچ شنبے نادے آ داڑے غیر وابستہ تحریک نا رابطہ ٹولی نا دیوان نا وخت آ ’’اے پی پی‘‘ تون گپ وتران کرسا کرے۔ اوپارے کہ پاکستان و آذربائیجان نا نیام اٹ داوخت آ ہڑتوم آ کنڈآتا واپار برنج تون اوار پاکستان آن 90 درسد برآمد آتیا تالان ءِ۔ سفیر پارے کہ آذربائیجان ساڑی ہی ٹی پاکستانی برنج نا برآمد آ کسٹم ڈیوٹی آن استثنیٰ تسنے ہراڑان برنج نا برآمد آک 30 آن 40 ملین ڈالر اسکان ودرہ۔ پاکستانی سفیر ہڑتوم آ ملک آتا نیام اٹ دودوربیدگی و ہڑتوم آ کنڈآتا تعلقداری نا ذکر ءِ کرسا پارے کہ آذربائیجان نیامی ایشیا و سویلی قفقاز نا اسٹ انگا ملک ءِ ہرانا پاکستان کن براہ راست جہاز ءِ۔ اوپارے کہ پاکستانی شاری تے آذربائیجان کن آن لائن ویزا نا آسراتی ہم دوئی ءِ۔ پاکستان نا سفیر پارے کہ پاکستان غیر وابستہ تحریک نا فعال باسک ءِ و سروکی دیوان اسہ ہند ن ءُ ملک اسے ٹی اڈ ہلنگ ءِ ہراڑتون پاکستان نا بھاز خڑکی و خصوصی تعلقداری ءِ۔ اوپارے کہ پاکستان آذربائیجان ءِ تینا گل زمین ءِ درملکی کوزہ غان نجات ترفنگ نا جہد اٹی ہرفورم آ مخ تفی کرینے، آذربائیجان نا الس پاکستان تون مہرومریبت کیک و نن دا مہرومریبت ءِ پبی اقتصادی تعلقداری ٹی بدل کننگ نا کوشست کننگ اُن ہراٹی ہڑتوم آ کنڈآتا واپار غٹ آن اہم ءِ۔ اوپارے کہ اقوام متحدہ غان پد ارٹ میکو غٹ آن بھلا پلیٹ فارم مننگ نا ناطہ غیر وابستہ ملک آتا تحریک مدام علاقائی جھیڑہ غاتا پرامن ایسری نا کوشست کرینے۔ اوپارے کہ غیر وابستہ تحریک اٹی پاکستان مدام ویل آتا پرامن ایسری نا کوشست کرینے، پاکستان بھارت نا غیرکانودی کوزہ ٹی جموں وکشمیر و ایلو علاقہ غاتیا درملکی کوزہ و جھیڑہ غاتے ہم داوڑنا فورم تیان ہرفینے۔ پاکستان نگورنو کاراباخ نا ویل آ آذربائیجان نا ہرفورم آ پبی مخ تفی ءِ کرینے۔ اوپارے کہ شونداری مدام امن تون گنڈوک مریک و ہروڑنا جھیڑہ نا حالیت اٹی شونداری نا مدام اولیکو نسخان مریک۔ اوپارے کہ بنجائی وزیر اقتصادی امور سردار ایاز صادق سروکی دیوان اٹی وزیراعظم شہباز شریف نا نمائندگی ءِ کرے ہراٹی ساؤتھ ساؤتھ کمکاری آ ہم گپ وتران کننگک و کوویڈ۔ 19 آن پد انا چیلنج آتا مون ءِ توننگ کن حکمت عملی اس پیش کننگک۔ اوپارے کہ غیر وابستہ تحریک مدام بلاک نا سیاست اٹ اوار مننگ نا جاگہ غا پدتموک ملک آتا بنداوی حق اتون تعلقدار ویل آتےا یسر کننگ نا کوشست کرینے۔
