وزیراعظم نا سلاہکار امور کشمیر و گلگت بلتستان قمر زمان کائرہ تون گلگت بلتستان نا وزیراعلیٰ خالد خورشید نا اوڑدہی

اسلام آباد۔ 01 مارچ (اے پی پی) وزیراعظم نا سلاہکار امور کشمیر و گلگت بلتستان قمر زمان کائرہ و گلگت بلتستان نا وزیراعلیٰ خالد خورشید گلگت بلتستان نا آئینی ویل و خولم نا نہاد نا تعین و فراوانی نا بابت تینی پہ تینی سلابت اٹ لائحہ عمل اس ترتیب تننگ آ امنا کرینو۔ چارشنبے نادے آ جاری بیان نا رداٹ امنائی سلاہ وزیراعظم نا سلاہکار امور کشمیر و گلگت بلتستان قمر زمان کائرہ تون گلگت بلتستان نا وزیراعلیٰ خالد خورشید  نا نیام اٹ اوڑدہی ٹی مس ہراٹی گلگت بلتستان اٹی سیکورٹی حالیت، شونداری ڈٹ ، بجٹ ایشو و خولم سپلائی نا بابت سرجمی اٹ گپ وتران کننگا۔ داوخت آ گپ و تران کرسا قمر زمان کائرہ پارے کہ گلگت بلتستان اٹی تنخواہ، شونداری ڈٹ و خولم فراوانی نا بابت وزیراعظم تون اوڑدہی کرینے، وزیراعظم گلگت بلتستان نا ویل آتے اولیتی بنداو تیا ایسر کننگ نا پارت جاری کرینے۔ اوپارے کہ ہروڑنا سیاسی تعلقداری آن ایڑتر مرسا گلگت بلتستان نا ویل آتا ایسری ءِ برجاتخنہ، زرگزرانی چیلنج نا بابت مچ آ پاکستان ءِ دشواری مون تروک ءِ۔ گلگت بلتستان نا زرگزرانی ویل آتا ایسری کن تعلقدار فورم تون رابطہ کرسا اوفتا ایسری اس پٹنہ۔ اوپارے کہ تدوک آ سال غٹ صوبہ غاتا بجٹ آ کٹ خلنگا ولے گلگت بلتستان نا سالانہ بجٹ ءِ برقرار تخنگا۔ اوڑدہی ٹی خولم نا فراوانی و نہاد آتا بابت ہم سرجمی اٹ گپ وتران کننگا۔